Sekretariadu Tekniku Administrasaun Eleitoral (STAE) no Comisaun Nasional ba Elisaun (CNE) hahu sosializa informasaun kona ba sistema eleitoral no edukasaun sivika ba komunidades no estudantes iha teritorio tomak.
Diretor Jeral STAE, Acilino Manuel Branco hatete sira halo ona koordenasuan ho prezidente autoridade munisipios no universidade balun hodi bele mobilize komunidade no estudante sira partisipa iha aktividade
sosializasaun informasaun sira.
“Ami sei halo edukasaun sivika no eleitoral kobre teritorio tomak, atu sensibiliza komunidade sira hodi buka kontribui no partisipa iha prosesu demokrasia ida ne’e,” nia hateten iha edifisio adminsitrador munisipio Dili.
Alende ne’e nia dehan sira mos destaka ona brigada eleitoral sira iha sukus atu halo mos edukasaun sivika ba komunidade sira iha area rural.
Nia hatutan, depois de resensiamentu STAE sei halo exposizaun lista eleitores kada suku atu fo oportunidade ba iha eleitores hodi verifika sira nia naran, karik iha sala ruma antes tama loron eleisaun.
Nia mos informa, katak elisaun parlamentar iha fulan Julhu mai sei iha posibilidade atu aumenta sentru votasaun no estasaun de votus iha munisipio balun tanba iha elisaun prezidensial 20 Marsu foin lalais ne’e ema barak la
vota tanba sentru votasuan limitadu.
Entretantu Vise Prezidente CNE, Duarte Tilman Soares hatete sira esforsu atu hadia failansu hirak ne’ebe mosu iha elisaun prezidensial liu ba, fasilita sidadaun sira aktualiza kartaun eleitoral tuir rezidensia determinante hodi
garantia sira bele vota iha loron votasaun.
Nia espera, ho informasaun sira ne’ebe iha bele konvense diak liu tan sidadaun ida-ida atu sente importansia partisipa iha festa demokrasia.
“Sidadaun hotu-hotu tenke iha konsientementu ida katak hau nia votu mak determina mudansa dezenvolvimentu iha rai ida ne’e nian, ne’e mak importante,” nia hateten.
Iha parte seluk, Xefe Suku Fatu-Hada Marcelino Soares kompromete servisu hamutuk ho instituisaun governu atu sosializa informasaun ba komunidade kona ba aktu eleitoral ne’ebe la’o iha rai laran.
“Ami prontu atu koopera ho instituisaun relevante sira liu –liu kria kondisaun hodi sensibiliza ita nia populasaun sira atu involve iha festa demokrasia ida ne’e,” nia hateten.
“Hanesan sidadaun diak ita hotu tenke ezerse ita nia direitu siviku ida ne’e hodi determina dezenvolvimentu ba ita nia pais.”
