Unidade Espesial da Polisia (UEP) kontinua menus fasilidades no situasuan ida ne’e difikulta ba sira nia servisu iha baze.
Komandante UEP, Superintendente Xefe Afonso dos Santos husu ba Komando Jeral Polisia Nasional Timor-Leste (PNTL) atu kria kondisaun diak no ekipamentus ne’ebe adekuadu hanesan taming, borgol, gas air mata no
seluk tan hodi garantia servisu membru sira iha baze.
Tanba tuir nia, sira nia knar importante atu haree liu kona ba insidente ou konflito ho nivel altu ne’ebe akontese iha rai laran.
“Ministeriu Interior ho Komando Jeral tenke haree situasaun ida ne’e,” Komandante Santos husu, iha Dili.
Maske menus fasilidades, maibe nia dehan servisu UEP nian kontinua la’o no nafatin prepara sira nia aan ho efetivu no kualidade, atu responde ba kualker situasaun wainhira estadu presiza.
“UEP ka’er metin prinsipiu patriotismu hodi banati tuir veteranus sira nia luta, iha ou laiha prontu atu servi povu no proteje nasaun no nia riku soin tuir misaun forsa espesial nian,” nia hateten.
Enkuantu Komandante Jeral PNTL, Komisariu Polisia Julio da Costa Hornai rekonese kestaun ne’e e sira iha ona hanoin atu tau matan masimu ba preokupasoens hirak ne’e maibe orsamentu limitadu.
“Ita tenta atu hadia nei-neik bazeia ba envelope fiskal ne’ebe governu koloka ba komando PNTL tuir prioridade ne’ebe maka iha, labele halo buat hotu dala ida deit, ,” nia hateten.
Iha parte seluk Membru Komisaun B Parlamentar (seguransa, defeza, negosiu estrangeirus), Cesar Valente hatete governu tenke iha planu ne’ebe adekuadu atu responde ba kestaun hirak ne’e.
Tanba tuir nia, atu asegura seguransa rai laran bele la’o ho diak, governu presiza investe fundus no fasilidade ne’ebe adekuadu ba autoridade da seguransa.
“Governu iha responsabilidade tomak atu haree ba kestaun ne’e, tenke kria planu ne’ebe diak no aponta faltas no difikuldade ne’ebe sira infrenta hodi bele halo diskusaun iha orsamentu jeral,” nia hateten.
