Mane (arguido) ida baku nia fen (lezada) tanba deit lezada bandu nia atu labele simu telefone iha tempu kalan (kuazu tuku ida ho balun kalan) no husu atu taka, maibe arguido lakohi no basa fali lezada.
Tuir akuzasaun Ministeriu Publiku ne’ebe lee sai husi juis prezidente katak, iha 13/08/2015 kalan tuku ida ho balun, arguido toba dukur hela derepente telefone lian, entaun arguido hader mai no foti telefone hodi halai sai ba liur, e iha momentu ne’eba lezada rona hela maibe vinji toba, arguido koalia mais umenus durante oras ida ho balun.
Komu sente ladiak, entaun lezada hader hodi la’o sai ba liur no husu ba arguido atu taka ona telefone, maibe arguido lakohi no kontinua koalia, ba dala rua wainhira arguido koalia namanas hela lezada no nervozu ba hadau deit telefone.
Entaun arguido basa tiha lezada no hadau fali telefone iha depois arguido tama liu ba kuartu laran hodi toba.
Sente ladun satisfas ho hahalok arguido nian ne’e, entaun lezada kontinua murmura no ikus mai arguido sai mai foti tan bola labarik nian tuda lezada nia kotuk laran.
Hafoin lee sai akuzasaun hirak ne’e, juis prezident husu ba arguido hili koalia ou nonok maibe arguido hili nonok, hodi prova katak akuzasaun Ministeriu Publiku los hotu.
Tanba arguido la koalia, entaun juis prezidente husu ba lezada atu hato’o nia deklarasaun iha tribunal, katak iha momentu ne’eba arguido koalia duni ho feto ida no lezada rasik deskobre tiha feto ne’e.
Maske nune’e, nia dehan sira diak malu ona no durante ne’e (hafoin akontesementu) arguido la halo tan ona attitude ida ne’e.
“Ami diak malu ona no nia la halo tan hahalok ne’e,” lezada deklara iha Tribunal Munisipal Dili.
Iha fatin hanesan Ministeriu Publiku akuza arguido ho lei numeru 145 kodigu penal kona ba ofensas ba integridade fizika simples ho forma violensia domestika, no husu ba tribunal atu fo pena ne’ebe adekuadu.
Enkuantu juis prezidente deside fo pena administrasaun ba arguido.
