Mane ida (arguido) ho konsiensia uza korenti motor hodi baku tiha vitima to’o ulun ran, ho hahalok hirak ne’e tribunal deside fo pena fulan tolu.
Tuir akuzasaun hosi Ministeriu Publiku (MP) katak, iha loron 29 fulan Abril tinan 2016, oras tuku 16:00 lokraik mosu diskusaun entre arguido ho vitima, tanba arguido ho nia familia halo agregasaun fiziku hasoru lezada nia alin feto.
Iha diskusaun nia laran arguido ladun satisfas ho vitima nia liafuan, entaun ho nervozu arguido foti korente motor hodi baku iha vitima nia rentos to’o ran.
“Hau ba husu tanba saida baku hau nia alin feto, maibe derepente deit nia uza korenti ne’e baku hau to’o ran,” vitima deklara iha tribunal, Dili.
Agregasaun fiziku ne’e halo vitima tenke ba halo tratamentu iha Ospital Nasional Guido Valadares.
“Hau hetan suku pontu tolu,” vitima dehan.
Iha tempu hanesan arguido mos fo nia deklarasaun iha tribunal hodi rekonese hahalok ne’ebe nia halo ne’e no promete sei la repete aktu ne’e iha future.
“Hau arepende duni hahalok ne’ebe mak hau halo ona,” arguido arepende.
Maibe tanba hahalok ne’ebe argudio komete ne’e viola ona lei kodigu penal artigu 145, entaun reprezentante husi ministeriu publiku husu ba tribunal atu fo pena prizaun fulan tolu no suspende ba tinan ida.
Enkuantu defensor publiku (DP) ne’ebe halo defeza ba arguido, husu ba tribunal atu fo pena ne’ebe adekuadu ba arguido, tanba arguido nudar kaben nain no iha oan barak, no arguidu rasik arapende ba hahalok ne’ebe nia komete.
Entretantu hafoin rona tiha deklarasaun husi arguido no vitima, juis prezidente deside fo pena prizaun fulan tolu ba arguido.
