Feto nain 20 (husi munisipio Bobonaro, postu administrativu Balibo) mak tuir ona formasaun iha sentru formasaun HIAM Health kona ba valor nutrisaun iha aihoris marungi nian.
Diretora Organizasaun Hamutuk Ita Ajuda Malu (HIAM) Heatlh, Rosaria Martins da Cruz hateten objetivu husi formasaun ne’e, mak atu haforsa feto nia konesementu kona ba seguransa nutrisaun iha marungi.
Nia dehan, Timor iha marungi barak maibe komunidade la konsumu tanba falta konesementu kona ba funsaun lolos husi aihoris ne’e.
“Kuaze valor nutrisaun hotu iha marungi ne’e ; hanesan vitamina C, protein no potassium,” nia esplika, iha nia knar fatin Aimutin, Dili.
“Bainhira konsumu nia tahan fresku, ne’e nia vitamina C mak barak liu maibe produs sai ona u’ut, ne’e protein mak aas liu,” nia hateten.
Alende konsumu marungi nia tahan, fuan no funan, nia hateten marungi nia abut no kulit mos iha funsaun hotu.
Depois de formasaun remata, nia dehan HIAM Health sei hili ema nain 10 husi nain 20 ne’e hodi mobilize komunidades kuda marungi no produs marungi sai aihan suplementar iha familia laran.
Nia informa, HIAM Health iha fini sufsiente atu distribui ba komunidades iha postu administrative Balibo hodi kuda.
Hili munisipio Bobonaro sai pilotu ba programa community engagement in marungi, tanba nia dehan tuir peskiza Timor-Leste food nutrition survey 2013, munisipio refere malnutrisaun aas depois munisipio Ermera.
Nia dehan, programa hanesan sei alarga tan ba iha munisipio seluk bainhira hatudu progresu no impaktu ne’ebe diak iha komunidades.
“Ami iha planu foun bo’ot ida atu kuda marungi, nune’e bele produs fali sai aihan nutrisaun ba iha familia uma kain sira no bele distribui ba eskola no klinika sira,” nia hateten.
Nia informa, programa ne’e hetan apoiu fundus husi orgnaizasaun internasional ida iha UK ho naran Isle Of Man (IOM).
Iha parte seluk formador Antonio Guterres, hateten materia ne’ebe partisipante sira simu durante semana rua maka nutrisaun baziku, malnutrisaun no impaktu no prosesu kuda marungi tuir metodo modernu nian.
“Ami hanorin sira komesa husi selesaun fini to’o iha koileta no prosesu sai aihan ne’ebe bele konsumu,”nia hateten.
Alende ne’e, nia dehan sei iha mos atividade demonstrasaun tein liga ba marungi ba partisipantes atu sira bele iha konesementu, tanba marungi la’os deit da’an ho batar, maibe bele halo buat seluk hanesan dosi.
Kona ba fini marungi ne’ebe HIAM Health iha, nia dehan sosa fali husi komunidades iha postu administrative Atauro no munisipio Bobonaro rasik, tanba area hirak ne’e iha potensial bo’ot ba marungi.
