Primeiru Ministru, Rui Maria de Araujo hateten implementasaun ba iha Sustainable Development of Goal’s (SDG) iha Timor-Leste sei avansa iha setor hat ne’ebe sai hanesan xave ba moris diak povu nian.
Nia dehan, setor hat ne’ebe governu sei foku iha tinan 2017 maka hanesan setor agrikultura, saude, kualidade edukasaun no infra-estruturas baziku (bee no saneamentu).
Alende seitor hat iha leten governu mos sei fo prioridade ba iha elisaun Jeral tinan oin, Araujo hateten, iha enkontru Timor –Leste Development Parnership Meeting, iha Convention Center Dili.
Nia dehan iha mos objetivu seluk ne’ebe governu sei haree iha mediu no longu prazu maka dezenvolvimentu humanu iha setor saude no igualidade jeneru.
Xefe governu ne’e mos apela ba instituisaun hotu governu, setor privado no sosiedade sivil sira atu servisu maka’as hodi atinji objetivu sira ne’e no fo moris diak ba povu.
Nia dehan, iha SDG’s ne’e iha objetivus 17, no objetivus hirak ne’e la ses husi Planu Estrategiku Dezenvolvementu Nasional (2011-2030) Timor –Leste nian, tanba objetivu sira ne’ebe iha SDGs iha tiha ona planu governu nian atu implementa iha mediu no longu prazu.
Iha oportunidade ne’e mos, PM Araujo hato’o agradesementu ba ema hotu ne’ebe servisu hamutuk ho Timor-Leste no supporta ona setor prioridade nasional Timor nian.
“Servisu ne’ebe maka ita halo hamutuk importante tebes no hadia ona situasaun ami nia povu no ami nia rai,” nia hateten.
Oportunidade hanesan, primeiru ministru simbolikamente lansa SDGs iha Timor-Leste no husu ema hotu atu sai sasin ba akordu no komitmentu ne’ebe governu Timor-Leste halo hodi atinji objetivu globals.
Iha tinan 2010 estado Timor –Leste adopta uluk objetivu globals Millennium Development Goals (MDGs) ne’ebe nia misaun remata ona iha tinan 2015.
Iha tinan hanesan 2015 estado adopta tan objetivu globals foun ho naran Sustainable Development Goals (SDGs) ne’ebe nia objetivus hanesan atu halo dezenvolvimentu iha rai laran no moris diak povu nian, objeitvu global ne’e nia mandatu sei remata iha 2030.
Entretantu Diretor Forum Organizasaun Non Govermental Timor-Leste (FONGTIL), Arsenio Pereira hateten Timor-Leste hanesan nasaun ki’ik ne’ebe adopta objetivu global sira no governu tenke esforsu aan hodi atinji objetivu sira ne’e hodi fo moris diak ba povu.
Nia konkorda, governu foka ba setor importante sira ne’e (saude, edukasaun, infra-estruturas baziku, agrikultura) tanba povu atu moris diak setor sira ne’e tenke hetan atensaun maka’as.
“Hau hanoin importante duni atu foku ba problema malnutrisaun tanba presidente republika mos fo atensaun ba asuntu ida liu husi realize premiu nutrisaun atu ekonraja Timor oan hotu hodi redus malnutrisaun,” nia hateten.
Kona ba progresu implementasaun ba Millenium Development Goals (MDGs), nia dehan Timor-Leste la atinji nivel mundial maibe nivel nasional iha setor balun mak atinji hanesan povu asesu ona ba iha eletrisidade, estradas rural no harii uma ba ema kbi’it laek sira.
Iha parte seluk, Diretora Fundasaun Alola, Alzira Reis hateten liu husi programa kampania susu ben kinur no planu partu ba familias durante ne’e fo duni kontribuisaun lubuk ida ba atinjimentu objetivu MDGs liu –liu redusaun numeru mortalidade inan ho oan iha Timor-Leste.
Nia hatutan, Fundasaun Alola pronto atu servisu hamutuk ho governu no parseirus seluk hodi kontribui ba moris diak povu nian liu –liu feto no labarik iha Timor-Leste.
“Tinan 2016 ne’e, ami estabelese grupo supporta inan iha suku hotu iha munisipio Dili no regiaun especial Oe-Cusse ho objetivu halo edukasaun nutrisaun ba komunidades liu –liu inan sira,” nia hateten.
Nia hateten, SDGs hanesan matadalan importante ba governu atu fokus ba setor importante sira hodi fo moris diak ba povu liu –liu feto no labarik tanba iha 17 objetivu global ne’e konsidera mos asuntu feto no labarik.
