Ministerio Edukasaun selesiona profesores kontratadu nain 973 sai funsionario permanente hanesan profesores.
Profesores nain 973 ne’e, tuir Ministru Edukasaun, Antonio da Conçeicão, katak prienxe duni kriteria (lisensiatura) hodi sai profesores permanente.
“Profesores kontratadu ami rezolve ona, agora sira sai ona funsionario permanente,” nia hateten iha salaun ME, Vila Verde, Dili.
Maske nune’e, nia dehan sei iha nain 3000 resin mak presiza tuir fali formasaun, tanba la prienxe kriteria.
Iha orsamentu envelope fiscal, nia dehan Minsiterio Edukasaun hetan $98 miloens deit e husi osan ne’e $70 miloens resin mak aloka ba iha salario vensimentu funsionario ME nian.
Entretantu Prezidente Komisaun F (saude, edukasaun, kultura, veteranus e igualidade jeneru), Deputadu Virgilio da Costa Hornai hateten kompetensia ministerio nian atu halo estatute profesores nian tuir criteria ne’ebe iha.
“Ministerio mak tenke hola medidas sira ne’e,” nia hateten
Tanba tuir nia, profesores barak mak la prienxe kriteria (nivel edukasaun la to’o) e iha sorin seluk eskola presiza profesores.
“Presiza tetu didiak atu asegura kualidade ensino nian.,” nia dehan.
Nia rekonese, katak iha orsamentu ratifikativu la koalia kona ba problema ne’e, maibe iha orsamentu annual iha mos orsamentu spesial hodi haree estatutu profesores sira.
