Komisaun Nasional ba Direitu Labarik (KNDL) ejiji ba Konselho Ministru (KM) atu fo prioridade hodi diskute esbosu lei justisa juvenile antes tama tinan 2017.
Tuir Prezidente KNDL komisaria Maria Barreto, katak lei ne’e importante tebes atu fo protesaun ba labarik sira ne’ebe konflitu ho lei.
“Hau preokupa tanba iha 2017 ne’e ita iha eleisaun parlamentar no prezidensial, se tinan ne’e adia tan, hau fiar lei sei pendente tan,”
Iha mos kontiudu esbosu lei ne’e, nia esplika ; iha lei rua mak koalia iha lei justisa juvenile ne’e nia laran; ida mak lei regime especial koalia kona ba labarik ne’ebe ho idade 16-20, no lei titular edukativu de minor katak labarik ho idade 12-15 ne’ebe konflitu ho lei.
Tanbarealidade numeru labarik komete krime aas, entaun nia hateten tenke iha lei ida atu proteje sira nia direitu hanesan labarik.
“Iha prizaun Becora, numeru labarik aumenta ba beibeik, hatudu katak ita presiza fo atensaun ba lei hirak ne’e nune’e fo protesaun ba sira,” nia hatutan.
Iha parte seluk Sekretario Estado Konselho Ministru, Avelino Maria Coelho da Silva, hateten proposta lei ne’e tama ona iha Konselho Ministru maibe seidauk ajenda atu diskute. “Seidauk ajenda,” nia hateten.
Kona ba bainhira mak atu ajenda hodi halo diskusaun, maibe nia la fo data klaru, tanba asuntu prioridade barak mak presiza diskute uluk.
Entretantu Prezidente Parlamentu Nasional, Deputado Aderito Hugo, hateten parlamentu fo apoiu tomak ba legislasaun sira ne’ebe sei vakum hela inklui lei justisa juvenile ne’ebe sei iha hela prosesu.
“Bainhira kuandu lei ne’e mai iha parlamentu, entaun ami bele fo apoiu ba legislasaun ne’ebe sei vakum hela,” nia hateten.
Nia rekonese, katak governu halo ona esforsu oioin hodi fo protesaun ba labarik sira, maibe presiza haforsa liu tan liu liu husi legislasaun espesifiku sira.
