Membru Parlamentu Nasional (PN), Deputadu Manuel Guterres, konsidera governu failha iha kontrolasaun ba rai estado, e husik komunidades harii uma (permanente) tiha mak foin governu hakfodak fo notifikasaun husu sira atu hamamuk tiha rai estado.
Tuir lei numeru 1/2003, nia rekonese, katak governu iha poder atu halo notifikasaun ba komunidades ne’ebe okupa rai estado, maibe tenke fo iha inisio konstrusaun hahu atu sira labele sai vitima.
“Tanba sa la halo intervensaun iha inisiu sira halo uma ne’e, agora hein uma remata ona mak foin halo notifikasaun,” Deputadu Guterres lamentavel, iha plenaria PN.
Alende ne’e, nia mos sujere ba autoridade kompetente, atu investiga mos autoridade local sira, tanba iha komunidade balun hetan lisensa husi autoridade balun hodi harii uma.
Nia sujere, mos ba Sekretariado Estado Terras e Propriedade atu kria ekipa ida involve Ministerio Obras Publiku hodi halo analiza uluk ba kustu uma antes fo endeminizasaun, tanba iha uma balun kustu liu $20 mil resin.
Lamentasoens hanesan mai mos husi komunidade Jose da Silva, katak governu sempre failha kontrola, tanba realidade ne’ebe iha intervensaun sempre tarde bainhira uma permanente ona.
“Tuir lolos bainhira komunidade hahu harii uma, autoridade local sira tenke hapara ona sira, tanba ne’e rai estado, nune’e sira mos labele lakon osan,” nia hateten.
