Tribunal Munisipal Dili hala’o audensia julgamentu ba kazu ofensas integridade fizika simples ne’ebe involve arguida MF (fen) baku vitima LS (la’en), tanba vitima la sosa mina morin ba arguida.
Tuir akuzasaun ne’ebe lee sai husi juis prezidente, katak iha dia 26 Setembru 2015, arguida no vitima ba bazaar hodi sosa modo, wainhira atu fila arguida husu ba vitima atu sosa tan mina morin, maibe vitima dehan “osan laiha,” entaun arguida hasai osan rasik hodi sosa mina morin. Iha motor leten mosu diskusaun entre vitima ho arguida.
Iha diskusaun nia laran, arguida sente nervozu hodi baku nia la’en nia kotuk laran dala tolu, no kuu iha kotuk laran dala ida, ho akontesementu ne’e vitima sente moras, entaun ba kedas ho arguida ba vitima nia bin nia uma.
To’o iha ne’eba arguida lakohi tuun hodi lori fali motor ba sira nia uma iha Beto, iha altura ne’eba vitima nia bin sente hahalok ida ne’e hanesan krimi ida, entaun vitima nia alin ba hato’o keixa iha polisia.
Hafoin lee sai akuzasaun hirak ne’e juis prezidente husu ba arguida atu presta nia direitu hodi hili koalia ou nonok, hodi deklara katak akuzasaun ne’ebe mai husi Ministeriu Publiku ne’e los ou sala, maibe iha altura ne’eba arguida hili koalia hodi dehan asaun ne’ebe mak nia halo ba vitima ne’e tanba momentu ne’eba nia nervozu loos.
“Hau hanesan nervosu mak hau halo hanesan ne’e, maibe hau hadomi hau nia laen, no durante ne’e hau nunka halo tan aktu hanesan,” arguida MF deklara iha audensia julgamentu, iha TMD.
Hafoin akontesementu ne’e, nia dehan, vitima konsege la ba uma durante loron ida , entaun arguida ba no husu diskulpa no lori hikas nia la’en ba uma, no agora dadaun sira nain rua moris hamutuk fali.
Hafoin rona tiha deklarasaun husi arguida, juis prezidente mos husu ba vitima atu fo nia poitmentu, maibe nia hili atu nonok, hodi konkorda katak deklarasaun husi lezada ne’e loos hotu.
Hafoin ida ne’e juis prezidente fo pena suspensaun ba arguida, atu iha future labele halo tan aktu hanesan, tanba asaun ne’ebe mak arguida halo hasoru nia kaben ne’e kategoria krimi ida.
