Organizasaun Movimentu Feto Foinsa’e (MOFFE), dadaun ne’e kapasita hela feto foinsa’e sira kona ba lideransa nian, prepara sira oinsa mak sai lideransa ne’ebe diak iha futuru.
Diretora Ezekutivu MOFFE, Yasinta Lujina, hateten programa prioridade ne’ebe sira halo mak fo kapasitasaun no prepara feto foinsa’e sira atu bele kaer ukun iha futuru.
“Prepara feto foinsa’e sira atu sira mos bele sai lideransa ne’ebe diak iha future,” Diretora Lujina hateten, iha nia knar fatin Farol, Dili.
Nia dehan, materia ne’ebe transforma ba sira mak hanesan oinsa konese sira nia aan, jestaun lideransa, meus negosiasaun, koalia iha publiku no seluk tan atu bele sai duni lideransa ne’ebe halibur ema hotu no halo duni mudansa ba povu nia moris.
Alende ne’e, nia hateten, Timor-Leste sei iha eleisaun tolu hanesan elisaun sukus, munisipio no eleisaun jeral ne’ebe sei realize iha tinan oin,e nesesario tebes atu haforsa feto foinsa’e sira hodi partisipa iha prosesu ida ne’e.
“Sira hetan ona matenek akademiku e ita presiza haforsa tan,” nia hateten.
Entretantu membru Grupo Feto Parlamentar(GFPTL), Deputada Jacinta Abu Cau Pereira, hateten feto foinsa’e balun involve ona iha vida politika, maibe presiza haforsa liu tan atu bele sai lideransa ne’ebe diak iha futuru.
“Presiza iha formasaun politika atu sira bele kompriende didiak politiku, tanba politiku la’os nakonu ho kroat, maibe oinsa transmite ita nia hanoin pratika hodi dezenvolve ita nia rain,” Deputada Pereira hateten.
Nia hatutan, partidu balun estabelese sentru formasaun politiku nian ba foinsa’e sira no forma sira sai lideransa ne’ebe diak iha futuru.
