Xefe Planeamentu Dezenvolvementu munisipiu Ermera, Inacio Madeira, hateten komunidades iha munisipiu Ermera kuaze 99% asesu ona ba eletrisidade.
Nia hateten, kuaze komunidades iha sukus 52 iha munisipiu ne’e asesu ona ba eletrisidade, falta deit suku Mertutu no Humboe, maibe agora dadaun kompania ne’ebe hetan fiar husi governu hahu halo hela instalasaun.
“Komunidade iha Ermera kuaze 99% asesu ona ba eletrisidade,” Xefe Madeira hateten, iiha Dili.
Tanba ne’e, nia dehan, komunidades ladun kestiona ona kona ba ahi, so estradas mak kada tinan sempre sai preokupasaun, no presiza atu hadia.
Tuir nia, rehabilitasaun no konstrusaun estradas iha Ermera durante ne’e la’o tarde oituan, tanba buat hotu depende ba sistema no orientasaun husi nasional.
Nia rekonese, katak durante ne’e governu liu husi Ministeriu Obras Publiku no Sekretariadu Estadu Politika Formasaun Profesional (SEPFOPE) hadia ona estradas rural, maibe barak mak sei aat.
“ Estrada barak mak presiza hadia,” nia hateten.
Iha parte seluk Membru Parlamentu Nasional, Deputadu Paulo Moniz, hateten komunidade Ermera 99% asesu ona baa hi, komunidade balun iha munisipiu seluk seidauk.
“Ne’e diak, maibe governu presiza toma atensaun ba komunidade iha munisipiu balun ne’ebe seiduak asesu ba ahi,” Deputadu Moniz sujere.
Maibe, nia dehan, importante liu mak governu presiza hadia instalasaun eletrisidade atu nune’e la bele iha failansu mate lakan.
Iha parte seluk Ministru Obras Publik Transporte e Komunikasaun (MOPTK), Gasto Sousa, hateten komitmentu governu nian mak tenke esforsu hodi instala eletrisidade ba komunidades hahu husi munisipius, postu administrativu, suku to’o aldeia, e iha munisipiu balun eletrisidade hahu tama ona to’o iha sukus.
“Iha tinan 2016 ne’e ezekusaun barak liu ba instalasaun eletrisidade no sosa mina ba oli pezadu iha Hera,” Ministru Sousa hateten.
Nia rekonese, iha munisipiu balun eletrisidade seidauk tama to’o iha sukus, maibe governu nafatin esforsu hodi kompleta.
