Fundador organizasaun Lalenok Ba Ema Hotu (LABEH), Christopher Henry Samson, hateten hahu tinan 2009 to’o agora konsege forma ona foinsa’e hamutuk nain 3000 resin iha area administrasaun publika, jornalismu baziku no lian Inglesh.
Nia dehan, sentru formasaun vocational LABEH hahu ho kursu lian Inglesh, tanba ejizensia husi foinsa’e sira, depois ida ne’e loke tan area rua hanesan jornalismu no administrasaun nian.
“Desde hahu to’o agora kuaze foinsa’e rihun tolu resin mak liu ona formasaun iha sentru formasaun LABEH,” Samson hateten, iha Comoro, Dili.
Husi numeru ne’ebe iha, nia hateten, maioria hetan ona servisus iha area espesializadas hanesan iha adminsitrasaun publika iha instituisaun governu, sosiedade sivil no barak sai ona jornalista.
“Hau kontente, tanba sira (estudantes) kuaze hetan hotu ona servisu iha ida-idak nia area esphesializada,” nia kontente.
Nia hatutan, fo formasaun lian Inglesh ba Timor oan sira la’os deit odi buka servisu, maibe prepara sira atu bele hetan bolsu estudu hodi asesu ba edukasaun ne’ebe nivel altu no kualidade.
Iha parte seluk, estudante Lorenso Soares, ne’ebe formadu iha area jornalismu nian, hateten sentru formasaun LABEH iha duni kualidade, tanba formadores sira espesializada duni ba area hirak ne’ebe iha.
“Hau orgulhu ho prosesu aprendizajen iha ne’e tanba formador sira maioria ema ne’ebe iha experiensia no espesifiku ba area sira ne’e,” nia orgulhu.
Nia hateten, sai jornalista la’os fasil, maibe ho komitmentu ne’ebe iha bele ultrapasa dezafius no bele sai duni jornalista ida ne’ebe professional.
