Membru Parlamentu (MP) Nasional, Deputadu Jorge Teme, kestiona maka’as kona ba ezistensia fatin fa’an ikan ne’ebe governu estabelese iha postu administrative Maubara, munisipiu Liquisa tanba husik abandonadu no sai fali bibi luhan.
Nia hateten, fatin ne’e halo hodi oferese ba negosiantes ikan hodi fa’an sira nia ikan, maibe realidade agora sai fali fatin animal nian.
“Ita fakar osan hodi halo fatin sira ne’e nune’e bele utilize ho diak, maibe ikus mai abandonadu fali ne’e oinsa,” Deputadu Teme kestiona,iha plenaria Parlamentu Nasional.
Lolos, nia dehan, governu tenke halo vizilansia de kontrolu rutina ba fatin fa’an ikan ne’ebe estabelese ona iha kada munisipius, nune’e fatin ne’ebe halo ona tenke uza labele abandonadu hanesan ne’e.
“Se la’e, ita fakar osan saugate deit,” Teme hateten.
Hatan ba kestaun ne’e Vise Ministru Agrikultura e Pescas (MAP), Marcos da Cruz, hateten fatin hirak ne’e abandonadu tanba negosiante sira laiha pasensia atu hein venderores no mos tanba sira laiha jelera atu tau sira nia ikan hodi fa’an.
“Sira tenke preserva sira nia ikan iha ne’eba, sosa jelera no es batu hodi tau iha ne’eba, atu nune’e ikan sira ne’e nafatin iha kondisaun para ema bele ba sosa, maibe sira la tahan atu hein, entaun sira ba fa’an fali iha fatin seluk,” Vise da Cruz hateten.
Nia informa, situasaun hanesan ne’e la’os akontese deit iha Maubara, maibe iha Taibessi no Manleuana, governu estabelese fatin hirak ne’e iha kintu governu hasai osan bo’ot ba ida ne’e ikus mai sira la uza.
“Sira lori la’o no ba fa’an fali iha fatin seluk,” nia hateten.
Nia dehan, kestaun ne’e la’os kontrolu governu mak minimu, maibe haree ba konsiensia kada negosiantes, hodi oinsa atu utiliza fatin sira ne’ebe governu estabelese ona ba sira.
Maibe, nia promote, atu iha future sei trasa hikas planu ne’ebe adekuadu hodi haree ba situasaun hirak ne’e.
Iha parte seluk negosiante ikan, Lurdes Goncalves, hateten fatin fa’an ikan ne’ebe mak governu estabelese ne’e diak ona, maibe governu seidauk iha politika ne’ebe diak oinsa mak bele mobilize konsumidores sira hodi mai sosa.
“Ida ne’e mak problema ne’ebe mak ami infrenta, sira ba halo los iha fatin ida ne’ebe mak ema baruk atu ba no do’ok ne’e oinsa,” nia hateten.
