Responsavel Sentru National Matan (SNM), Belmerio Jeronimo, hateten tinan ida ne’e sira sei la vizita munisipio hotu hodi halo konsultasaun no operasaun matan, tanba falta rekursu humanus.
Nia dehan, iha tinan kotuk sentru matan halo atividades movel iha teritorio tomak fo konsulta no halo operasaun matan ba komunidades ne’ebe iha problema ho matan, maibe tinan ida ne’e limita tanba falta rekursu humanus.
“Tinan ida ne’e ami hamenus, ami sei ba deit ospital referral 5 inklui mos sentru saude Atauro, tanba ami nia rekursu humanus no financial menus,” responsavel Jeronimo hateten, iha Dili.
Wainhira organizasaun The Fred Hollows Foundation NZ remata sira nia misaun, nia hateten, funsionario barak mak sai, tanba governu laiha kapasidade atu fo servisu ba ema hotu.
Nia informa, oras ne’e dadaun SNM iha nia funsionario nain 20 no doutor matan nain tolu (husi Cina, Nepal no Cuba).
Tuir dadus ne’ebe iha, iha tinan 2015 SNM registu pasientes matan hamutuk nain 10492. Husi numeru ne’e barak mak halo operasaun, tanba sofre matan katarak no iha balun haruka ba liur ho kazu tumor matan.
Iha parte seluk, komunidade Jose Sales, hateten governu iha obrigasaun atu apoia atividades ne’e tanba atividade outreach ne’e fasilita tebes komunidade sira ne’ebe vulneravel atu asesu ba tratamentu saude publiku sira.
“Mantein ezistensia atividades ne’e hodi fo oportunidade ba komunidade sira iha area remotas atu halo tratamentu ba sira nia matan,” nia hateten.
Nia mos rekomenda ba SNM atu kontinua programa konsulta movel no sosializasaun ba iha komunidades iha area remotas.
