Tribunal Munisipal Dili (TMD) hala’o julgamentu ba kazu krimi intregridade simples ne’ebe involve arguido HL (maun) baku vitima SL (alin), tanba fa’an sala fos.
Tuir akuzasaun husi Ministeriu Publiku ne’ebe lee sai husi juis prezidente, katak arguido (HL) haruka vitima (SL) lori fos hamutuk saku lima hodi ba fa’an iha Tasi tolu no iha altura ne’eba, vitima lori duni fos ne’e ba fa’an iha Tasi tolu. To’o iha Tasi tolu, ema konsege sosa duni fos saku hat no saku ida fali vitima fo ba nia kolega deve ho promete fulan hotu mak fo osan.
Hafoin fa’an fos hirak ne’e vitima fila ba uma, to’o iha uma, arguido husu kedas osan fos nian ba vitima no vitima entrega osan sira ne’e ba arguido, hafoin arguido sura osan sira ne’e la to’o, tanba ohin vitima lori fos saku lima, maibe osan ne’ebe vitima entrega ne’e folin fos saku hat nian.
Tanba arguido husu vitima, entaun vitima esplika ba arguido katak fos saku ida vitima fo ba nia kolega deve, tanba arguido la simu ho ida ne’e, arguido lolo kedas ain hodi baku vitima nia kotuk laran, to’o vitima monu ba rai no desmaia.
Wainhira vitima desmaia, vitima nia bin (primeiru) lori kedas vitima ba ospital no hafoin vitima hadeer vitima nia bin lori kedas vitima ba polisia hodi hato’o keixa.
Hafoin lee sai akuzasaun hirak ne’e, juis prezidente husu ba arguido atu hili koalia ou nonok, maibe arguido hili atu koalia hodi dehan ba tribunal, katak antes vitima sai ba fa’an fos hirak ne’e arguido hameno ba vitima atu labele fo ba ema atu deve.
“Tanba hau iha esperiensia maluk sira iha ne’eba ne’e deve tiha, maibe la selu, ita ba sisi mos sira dehan osan laiha, tanba ne’e hau hatete ba nia kuandu ema atu deve labele fo, ikus mai nia la rona hau, tanba ne’e mak hau tebe nia ne’e,” arguido SL deklara iha TMD.
Maibe, arguido dehan, nia parte husu ona deskulpa ba vitima no fo sala malu (tuir tradisaun) no agora vitima ho arguido hela hamutuk uma ida no haree malu nudar maun ho alin, no arguido promote atu la repete tan aktu hanesna iha future.
Hafoin rona tiha deklarasaun husi arguido, juis prezidente fo pena suspensaun tinan ida ba arguido no kada semana tenke halo relatoriu ba polisia.
