Unidade Polisia Maritima (POLTIMA ) organiza asaun proteze ambiental hodi bandu komunidade, atu labele raut ahu ruin iha tasi laran hodi fa’an fali.
Tanba tuir Segundu Komandante Unidade POLTIMA, Inspektor Xefe Joao Cesar da Silva, katak fatuk ahu ruin hanesan rikeza naturais Timor nian.
“Ami halo operasaun hahu husi Bidau Santana to’o iha Metiaut, ahu ruin sira ne’ebe iha tasi ninin inklui balun ne’ebe komunidade sira foti ne’e, ami hatun hotu ba tasi laran,” Segundu Komandante Silva hateten, iha Dili.
Nia dehan, fatuk ne’e nia funsaun importante tebes atu proteze ikan oan sira iha tasi ninin inklui halo defeza ba tasi been, labele sulin mai iha rai maran hodi estraga estrada no ai horis sira ne’ebe moris iha tasi ninin.
Nia esplika, iha dekretu lei numeru 9/2009 artigu 32, iha alinea D, fo kompetensia ba Polisia Maritima atu halo protesaun ba ambiente no kontrola ema labele foti ahu ruin ne’e no iha lei inan artigu 61 mos bandu komunidade labele utiliza fatuk ne’e ba atividade negosiu.
Antes ne’e, nia dehan, POLTIMA ho xefe suku sira sosializa ona ba komunidade kona ba importansia fatuk ne’e, no apela atu labele foti ahu ruin ne’e, maibe komunidade ne’ebe hela iha tasi ninin ulun to’os.
“Ami haruka sira atu para ona, labele kee ahu ruin sira ne’e, balun komprende balun kontinua bebeik atu kee, entaun agora ami tenke halo operasaun hela deit,” nia hateten.
Entretantu komunidade Maria Soares, ne’ebe babain foti fatuk iha tasi ibun, lamenta ho asaun polisia nian ne’e, tanba hili fatuk nudar servisu regular ne’ebe sira halo hodi buka moris.
“Bandu ami labele foti ahu ruin, ne’e hau komprende maibe sira labele bandu fali ami foti fatuk seluk, tanba ami moris ho ida ne’e,” nia lamenta.
Tanba ne’e nia husu ba polisia, wainhira halo operasaun tenke haree didiak fatuk sira ne’e, tanba fatuk balun la’os ahu ruin, maibe dala ruma polisia sira naran fakar arbiru deit.
