Membru Parlamentu Nasional (MP), Deputada Josefa Alvares Soares, husu ba Prezidente Parlamentu nasional atu ho urgentimente aselera diskusaun lei droga nian, tanba droga fo impaktu ladiak ba sira nia futuru.
Tuir nia, droga sai ona hanesan asuntu seriu iha rai laran, ne’ebe entidades hotu tenke preokupa, e jovens barak mak konsume ona droga, ne’e estraga sira nia future.
“Droga tama mai iha Timor atinji ona 200 kilograma, ne’e seriu tebes, tanba fo impaktu ladiak ba ita nia joventude sira iha rai laran, ita presiza aselera diskusaun lei ne’e,” Deputada Soares sujere, iha Parlamentu Nasional.
Nia dehan, droga ho fasil tama iha Timor, tanba fatin barak iha fronteira mak sei deskontrolu husi polisia, hanesan iha munisipiu Bobonaro, postu administrativu Maliana, suku Saburai, Loet, Tapo Memo no Humankhou, fatin hirak ne’e sempre iha atividade transaksaun sasan illegal.
“No movimentu ema mos kada loron iha hela deit, no laiha ida mak haree ba ida ne’e, ne’e frakeza ida ne’ebe mak ita tenke haree mos,” nia hateten.
Hatan ba kestaun ne’e, Vise Prezidente Komisaun A (constituicionais, justisa, administrasaun publika, poder local e anti korupsaun), Deputadu Arao Noe, rekonese katak lei ne’e tama ona iha komisaun A, maibe presiza halo diskusaun klean.
Maske lei ne’e hetan aprovasaun, maibe nia dehan, sei la fo benefisiu tanba legislasaun fraku no ekipamentus la sufsiente hodi detekta droga.
“Ita nia konstituisaun laiha pena de morte, pena masimu liu mak 30 anos e ita nia ekipamentus laiha, pur ezemplu ita laiha asu treinadu atu detekta inflitrasaun droga, frakeza sira ne’e mak dala ruma ema la tauk atu hatama droga mai timor,” Deputadu Noe duvida.
Tanba ne’e, nia sujere, antes lei ne’e aprova, Parlamentu Nasional tenke konkorda atu halo alterasaun ba konstituisaun atu fo pena de morte, espesifiku ba ema ne’ebe hatama droga mai Timor.
“Kazu krimi sira hanesan ne’e, ita bele fo pena de morte,” nia dehan.
Nia informa, iha Indonezia kuaze ema miliaun hat (4) mak detektadu konsume droga, tanba ne’e timor tenke haforte nia lei no haforsa sistema seguransa, ho nune’e mak bele evita droga buras iha rai laran.
