Diretor Klinika Polisia Nasional Timor-Leste (PNTL), Inspektor Xefe Abilio Goncalves, hateten provizoriamente tratamentu movel ba membrus polisia iha 12 munisipius paradu, tanba aimoruk laiha.
Goncalves hateten, tratamentu movel importante tebes, tanba membru polisia sira iha baze presiza tebes atendementu saude ho rutina.
“Agora paradu hela, ami hein deit kuandu aimoruk iha ona mak ami bele ba,” Diretor Klinika PNTL Inspektor Xefe Goncalves hateten, iha Kaikoli, Dili.
Nia dehan, kestaun ne’e hato’o ona (relatoriu) ba iha komando jeral, no agora dadaun prosesu hela.
Alende ne’e, nia mos husu ba mediku husi klinika nasional presiza tuun ba baze hodi monitoriza servisu mediku koresponden sira ne’ebe koloka ona iha 12 munisipius.
“Haree sira, oinsa sira nia progresu servisu fahe informasaun kona ba moras hada’et ba membru polisia no komunidade sira,” nia hateten.
Iha parte seluk Prezidente Komisaun F (edukasaun, saude, kultura igualdade jeneru no veteranus), Deputadu Virgilio da Costa Hornai, hateten atendementu saude ba membru polisia sira importante tebes, liu-liu ba sira ne’ebe servisu iha fronteiras.
Tanba ne’e, nia dehan, prosesamentu distribuisaun airmoruk ne’e tenke ho lalais, atu nune’e labele empede servisu medikus klinika PNTL.
“Tenke tuun hodi haree situasaun saude membru sira iha baze ne’e, balun ne’ebe afeita moras tenke halo kedas atendementu saude,” Deputadu Hornai ne’e hateten.
