Membru Parlamentu (MP) Nasional, Deputadu Eladio Faculto, husu ba governu liu husi Ministeriu Edukasaun atu hadia eskola Imaculada Conceicao no eskola Nosha Senhora de Lourdes iha munisipiu Ermera, tanba eskloa hirak ne’e iha kondisaun aat total.
Tuir nia, kuandu governu la toma atensaun ho urgente mak sei fo ameasas ba estudantes no profesores sira nia vida.
“Se husik kleur oituan mak hadia, bele monu e prejudika labarik sira nia vida, tanba nia infraestruturas ne’e aat tebes ona,” MP Faculto sujere, iha Parlamentu Nasional.
Tanba ne’e, nia husu ba governu atu toma atensaun ho seriu ba eskola rua ne’e, hodi nune’e estudantes no profesores sira hanorin ho seguru.
Tuir lolos, nia hateten, kada tinan governu tenke halo identifikasaun ba eskolas ne’ebe iha kondisaun grave no ladun.
“Nune’e ita bele hatene, eskola ne’ebe mak prioridade liu atu halo,” nia hateten.
Hatan ba kestaun ne’e Vise Ministra Edukasaun (ME), Dulce Jesus Soares, rekonese katak iha eskola balun mak seidauk hadia, tanba tenke la’o tuir kapasidade orsamentu ne’ebe iha.
“Neneik-Neneik sei kobre hotu, tanba tinan-tinan ministeriu sempre iha programa hadia eskola hirak ne’ebe mak aat,” Vise Ministra Soares hateten.
