Ministra Edukasaun (ME) Dulce Jesus Soares, hateten Ministeriu Edukasaun halo hela fiskalizasaun ba ensino rekorenti, hodi identifika funsionamentu eskola ensino rekorenti iha munisipiu sira.
Soares hateten, fiskalizasaun ne’e atu identifika eskola ensino rekorenti iha munisipius hira mak funsiona no hira mak la funsiona.
“Kuandu iha salas de aulas balun ne’ebe mak la funisona iha munisipiu sira, ami deside atu taka,” Vise Ministra Soares hateten, iha Dili.
Ho programa fiskalizasaun ne’e mak, nia dehan, agora dadaun pagamentu ba profesores sira sei paradu hela, maibe wainhira remata governu sei halo pagamentu.
Nia dehan, durante ne’e governu seiduak halo identifikasaun klaru, nune’e dala ruma prosesu aprendizajen ba eskola ne’e la ativu, maibe profesores sira kontinua husu sira nia salariu, entaun ne’e estadu lakon osan.
“Sira tenke servisu e aulas ne’e tenke funsiona, ita la selu ema ne’ebe mak nia aulas la funsiona,”nia hateten.
Nia dehan, agora ba oin eskola ensino rekorenti ne’ebe mak governu taka ona, sira laiha direitu atu hetan subsidio ne’e.
Iha parte seluk Deputada Jacinta Abucau, konkorda ho prosesu fiskalizasaun ne’e, maibe tenke kria mekanismu ne’ebe mak diak hodi rezolve problema ne’ebe iha.
“Tanba pagamentu ba profesores sira sempre tarde hela deit, talves tarde to’o fulan 6, espera ho fiskalizasaun ne’e sira bele rezolve problema,” Abucau esperansa.
