Joventude nain 50 ho voluntariomente hala’o doasaun ran hodi salva maluk sira liu-liu inan feton sira ne’ebe moras iha ospital ne’ebe presiza tebes ran.
Reprezentante joventude, Joni Alves, hateten asaun solidaridade ida ne’e hodi dere foinsa’e sira nia fuan katak ho fo ran turuk ida bele salva ema seluk nia vida, liu –liu inan feton sira ne’ebe presiza ran.
“Ne’e asaun ne’ebe inspira tebes ami joven sira, katak ita tenke fo kontribuisaun hodi ajuda komunidade sira ne’ebe moras iha ospital presiza ran, tanba ran nunka fa’an no sosa,” Alves hateten, hafoin fo nia ran, iha salaun Sekretario Estado Joventude e Desportu (SEJD), Lecidere, Dili.
Nia hatutan, atividade doasaun ran massal ne’e hala’o ho objetivu atu komemora loron mundial ba joventude sira ho tema “Salva ba, Kontribui ba liu husi O nia ran”.
Iha fatin hanesan, Xefe Unidade Banku Nasional de Sangue (BNS), Arsenio Jose Afonso, agradese ba foinsa’e lubuk ida ne’ebe ho voluntariomente fo ran ba ospital atu salva ema seluk nia vida.
“Ami iha stok limitado tebes tanba iha deit 35 stok ne’e la sufsiente atu bele atende ba nesesidades, tanba nesesidade barak liu –liu inan feton sira ne’ebe ran fakar depois partus presiza ran atu rekopera,” nia hateten.
Nia hatutan, atendimentu ne’ebe durante ne’e sira hala’o iha teritorio tomak la’os deit ba iha fasilidade saude publiku, maibe ba privadu sira hotu tanba Timor –Leste foin iha Banku de Sangue ida deit.
Entretantu reprezentante Sekretario Estado Joventude e Desportu (SEJD), Florindo Napoleao, hateten atividade ida ne’e hanesan atu motiva foinsa’e sira oinsa ajuda malu liu husi fo ran hodi salva ema seluk nia vida.
“Liu husi ran sira bele ajuda komunidades ne’ebe moras iha ospital presiza ran, ne’e kontribuisaun no solidaridade ida ne’ebe joven sira halo ba nasaun no ba maluk sira,” nia hateten.
Nia hatutan, governu aloka orsamentu ho montante $40,000 ba atividades selebrasaun loron mundial joventude tinan 2015, inklui ba atividade doasaun ran massal, desportu no seluk tan.
