Diretora Ezekutivu organizasaun Asistensia Legal ba Feto no Labarik (ALFeLa), Merita Correia, hateten durante tinan 2014 nia laran labarik feto ho idade (16 mai kraik) 46% mak hetan asaltu seksual husi sira (membrus) familia no ema seluk.
Numeru ida ne’e, nia dehan, bazeia dadus vitimas ne’ebe ALFeLa akompanha no fo asistensia legal iha prosesu justisa formal durante tinan 2014 nia laran.
“46% labarik idade menus husi 16 mak hetan abuzu seksual husi tiun, aman, vizinho,” Diretora hafoin lansa relatoriu annual iha salaun ALFeLa Vila Verde, Dili.
Tuir dadus ALFeLa iha tinan 2014, sira registu kazu asaltu seksual hamutuk 132 (29%) husi numeru ne’ebe iha labarik feto idade menus 16 anos, nain 61 (46%) mak sai vitima asaltu seksual husi membru familia no ema seluk.
Nia hatutan, oras ne’e dadaun ALFeLa hamutuk ho parseirus seluk hala’o advokasia ba politika governante no legislative sira atu bele iha artigu espesifiku ida kona ba violasaun seksual entre oan ho aman (insestu).
“Insestu akontese ba labarik ho otas ki’ik, ita la duvida bainhira iha evidensia maibe akontese ba feto klosan susar, tanba juis sira dala ruma dehan vitima mos hakarak halo relasaun ho aman,” nia hateten.
Tanba ne’e, nia sujere, estadu tenke hanoin ona atu kriminaliza aktu immoral ida ne’e, tanba kultura no religiaun (Katolika) la premite hahalok ida ne’e.
Iha parte seluk, Komisaun Nasional Direitu Labarik, Maria Barreto, preokupa ho numeru asaltu seksual ba minoridade ne’ebe kada tinan as, tanba ne’e sira nafatin halo advokasia ba politika governante sira atu konsidera situasaun ida ne’e hodi garantia justisa ba ema hotu.
“Ami nia papel halo advokasain ba politika sira atu bele foti desizaun ne’ebe diak, liu –liu halo alterasaun no revizaun ba kodigu penal ne’ebe iha, tanba ladun fo protesaun ba vitima violasaun seksual tipu insestu,” Komisaria Barreto hateten.
Nia hatutan, tinan kotuk Komisaun Nasional Direitu Labarik (KNDL) organiza ona sorumutu ida entre sosiedade sivil no legislador, governante sira hodi koalia kona ba asuntu interese vitima insestu nian.
Iha enkontru ne’e atual Ministru Justisa, Ivo Jorge Valente no membru PN balun konkorda atu halo amandamentu ida hodi halo alterasaun ba artigu 163 Kodigu Penal.
