Xefe Departamentu Defisensia e Idozos Ministerio Solidaridade Sosial (MSS), Mateus da Silva, hateten iha Orsamentu Jeral do Estado (OJE) tinan ida ne’e, ministeriu aloka $600 mil resin hodi apoiu organizasaun non govermental sira ne’ebe fo asistensia ba ema ho defisensia.
“Tinan ida ne’e orsamentu husi fundus transferensia kuaze $600 mil resin apoiu instituisaun ne’ebe servisu ba area defisientes nian,” Xefe Departementu da Silva hateten, iha Kaikoli, Dili.
Nia dehan, organizasaun sira ne’e hanesan parseiru governu nian hodi kria programa formasaun no atividades seluk hodi dezenvolve abilidade ema ho defisensia sira nian.
“Dezenvolve konesementu no hasa’e abilidade ema ho defisensia nian hodi asesu ba servisu,” nia hateten.
Nia hatutan, tinan ida ne’e iha organizasaun non governmental hamutuk 13 mak hetan apoia, hodi fo asistensia ba ema ho defisensia mental no fisiku sira iha rai laran.
Entretantu, Prezidente Konselho Ezekutivu Asosiasaun Defisensia Timor –Leste (ADTL), Joaquim Freitas dos Santos, hateten durante ne’e iha kooperasaun servisu ne’ebe diak tebes entre sosiedade sivil no governu hodi fo asistensia ba ema ho defisensia sira.
Nia mos sujere, ba MSS atu haforsa monitorizasaun no supervizaun ba iha ezekusaun orsamentu ne’ebe apoia ba organizasaun sira.
“Tenke haforsa monitorizasaun no supervizaun ba implementasaun atu ema ho defisiente bele hetan benefisio husi apoiu ida ne’e,” nia hateten.
