Tribunal Munisipiu Dili (TMD) hala’o julgamentu ba kazu integridade simples ne’ebe involve arguido FB (maun) baku lezada CM (alin feto), tanba deit lezada haluha taka bee sanho.
Tuir akuzasaun Ministeriu Publiku (MP) ne’ebe lee sai husi Juis Prezidente, Jose Araujo, katak iha tuku 17:00 lokraik, lezada (CM) ba loke bee sanho hodi fo haris labarik no enxe iha tanki hariis nian, maibe tanba iha altura ne’eba lezada sibuk ba tein, entaun haluha atu taka fali bee.
Iha momentu ne’eba arguido ba chek iha haris fatin bee nakonu to’o nalihun, maibe lezada seiduak taka bee, entaun arguido hirus ba lezada, no iha momentu ne’eba lezada mos hatan entaun arguido hakat ba lezada no basa lezada.
Hafoin lee sai akuzasaun hirak ne’e, juis prezident husu ba arguido atu hili koalia ou nonok, maibe arguido hili koalia, hodi rekonese ba tribunal katak nia baku duni lezada tanba nervosu.
“Hau baku duni nia, tanba bee sanho ne’e ladiak ona, haree ba bee nakonu ne’e tenke taka ona, hau koalia nia hatan fali, ne’e mak halo hau nervosu hodi baku,” arguido FB deklara, iha audensia julgamentu.
Maibe, nia dehan, agora dadaun lezada no arguido diak malu ona, tanba arguido husu ona diskulpa ba lezada.
Iha fatin hanesan juis president husu mos ba lezada atu hili koalia ou nonok, maibe lezada hili nonok hodi prova katak deklarasaun arguido ne’e los hotu.
Hafoin rona tiha deklarasaun husi arguido juis president fo pena suspensaun tinan ida, sei kuandu arguido halo tan aktu refere sei tama direitamente ba prizaun.
