Tribunal Munisipal Dili (TMD) hala’o julgamentu ba kazu ho forma violensia domestika, ne’ebe involve arguido AS baku no tebe lezada EF, tanba provadu adulteiru (selingkuh) ho mane seluk.
Tuir akuzasaun husi Ministeriu Publiku (MP) ne’ebe lee sai husi Juis Singular, Jumiaty Maria Freitas , katak arguido baku, tuku no tebe lezada iha kuartu laran durante loron hat tutuir malu, tanba arguido simu telefone husi ema seluk katak lezada halo relasaun seksual ho mane seluk.
Hafoin lee sai akuzasaun hirak ne’e, juis singular husu ba arguido hili koalia ou nonok, maibe arguido hili koalia no konsidera akuzasaun hirak ne’e los hotu no iha faktus hatudu duni katak lezada selingkuh duni ho mane seluk.
“Hau nia alin rasik mak hatete hau, depois hau husu ba nia, maibe nia nonok deit no ho tanis deit, tanba ne’e mak hau nervozu no baku nia,” arguido AS hateten, iha audensia julgamentu iha TMD, Dili.
Iha audiensia julgamentu ne’e mos, arguido aprezenta faktus balun ne’ebe haforsa katak lezada namora duni ho mane seluk (selingkuh).
Iha fatin hanesan lezada mos hato’o nia deklarasaun ba tribunal, katak durante forma uma kain iha tinan 2000, no agora oan nain lima, arguido sempre hanorin lezada ho baku deit, nunka koalia didiak.
“Tanba ne’e mak hau baruk, no hau la seguru ho nia,” lezada EF deklara.
Maibe nia rekonese, katak durante ne’e arguido mak sustenta uma laran, no haree labarik nain lima ne’ebe iha.
Hafoin rona tiha deklarasaun husi lezada no arguido, juis singular fo pena prizaun tinan tolu no suspende ba tinan tolu, maibe wainhira arguido komete tan krimi ruma arguido sei hetan prizaun preventiva.
