Reitor Universidade Nasional Timor-Lorosa’e (UNTL), Aurelio Guterres, hateten fo tomada de posse ba konselhu doutores nain walu (8) ne’e hanesan parte ida atu hadia estruturas akademia ho fakuldades universidade nian.
Tanba tuir nia, UNTL prepara nia rekursu humanus ho diak liu tan ho estruturas foun.
“Universidade presisa ran foun, presiza prepara rekursu humanus ho estruturas foun, nune’e bele halo universidade nia servisu dinamiku diak liu tan,” Reitor UNTL, Guterres hateten, iha Dili.
Nia esplika, Konselhu de doutores ne’e nia funsaun mak reforsa liu tan servisu administrasaun ho finansas universidade nian ho diak liu tan.
Iha mos Konselhu Doutores nain walu ne’ebe simu posse ho kargu, mak Samuel Freitas (decano Fakuldade Siensia Naturais), Eurico Araujo (decano Fakuldade Siensia Sosiais), Angelo Carascalão (decano Fakuldade Direito), João Martins (decano Fakuldade Medicina), Fernando Baptista (decano Fakuldade Ekonomia), Pedro Soares (decano Fakuldade Edukasaun), Mariano Renato (decano Fakuldade Engeenaria), no Acacio Amaral (decano Fakuldade Agrikultura).
Iha parte seluk Prezidente Konselhu Doutores, Francisco Miguel Martins, hateten pela primeira vez kria Konselhu Doutores iha UNTL, tanba ne’e sira sei servisu diak liu tan ba funsionamentu universidade nian.
“Liu-liu ba asuntus akademikus, asuntus administrasaun akademika no lala’ok akademika ne’ebe iha ita nia universidade nia laran,” nia dehan.
Nia dehan, konselhu doutores ne’e atu haforsa hakbiit servisu tomak andamentu akademika universidade nian iha fakuldade hotu-hotu.
Entretantu dosente Antero Benedito da Silva, husu ba estruturas foun UNTL ne’ebe simu posse, tenke reforsa servisu fakuldade ida-idak nian.
“Hau fiar decano nain walu ne’ebe mak asume ona kargu foun ne’e, bele apar ho pedagojia husi universidade nian, haree mos kona-ba kinerja servisu hadia sistema administrasaun universidade nian,” nia esperansa.
Nia hateten, dosentes UNTL prontu atu fo apoio ba decano foun nain walu (8) ne’ebe simu ona tomada de posse universidade nian.
