Membru Parlamentu Nasional (MP), Deputada Ilda Maria da Conçeicão, hateten komunidade barak mak agora konsumu hahan importasaun hanesan (ayam potong no seluk tan), tanba folin baratu kompara ho manu Timor ne’ebe folin karuun liu.
Nia dehan, la’os lakohi konsumu produtu local Timor nian, maibe situasaun mak obriga liu-liu kapasidade finanseiru mak la to’o atu sosa produtu sira ne’e hodi konsumu.
“Ba funsionario sira ne’ebe ho nivel 1 no 2 sira hakarak han na’an tenke halai ba ayam potong, tanba laiha kibi’it atu sosa manu Timor no na’an seluk ne’ebe fa’an ho folin karuun,” Deputada da Conçeicão hateten, iha Parlamentu Nasional.
Alende ne’e nia mos, sujere ba Ministerio Saude (MS) atu kontinua halo promosaun saude ba komunidades kona ba hahan ne’ebe saudavel no fo nutrisaun diak ba saude.
Iha parte seluk, Komunidade Maria Celeste, hateten hahan importasaun sira hanesan hahan kalen, ayam potong no sosis ne’e kontamina ona ho kimiku ne’ebe perigu ba saude.
“Ema dehan ayam potong ho sosis ne’e uza formalin tiha, maibe komunidades nafatin sosa, tanba folin baratu kompara ho ita nia manu timor,” nia dehan.
Nia dehan, iha merkadu manu Timor ida ho folin $10 ba leten no na’an kilo ida $5 ho familia bo’ot, entaun susar ba komunidade sira, liu-liu kbiit la’ek sira atu sosa naan rai laran nian.
“Ami hakarak han na’an, ami sosa ayam potong, sosis no seluk tan tanba ami hanesan trabalhador ho osan ki’ik $115, dalaruma fulan ida tomak ami la han na’an,” nia hateten.
Entretantu, Xefe Departamentu Saude Ambiental no Vigilansia Sanitaria MS, Tomasia de Sousa, hateten liu husi programa Servisu Integradu Saude Comunitaria (SISCA) parte saude nafatin halo promosaun saude ba komunidade sira inklui mos hahan ne’ebe saudavel.
“Liu husi SISCa ami informa nafatin ba komunidade sira, katak hahan ne’ebe saudavel mak hahan ne’ebe livre husi kimiku no polusaun,” nia hateten.
