Fasilitadór Postu Administrativu (FPA) na’in 76 iha 27 Janeiru 2015 asina Termo de Aceitação hodi sai funsionáriu públiku husi Diresaun Nasionál Agua no Saneamentu (DNSA), Ministerio Obras Publicas (MOP).
FPA (uluk ho naran Fasilitador Sub-Distritu ka FSD) hirak ne’e rekruta no selu hosi 2009-2011 liu hosi Programa Australia nian BESIK (Bee, Saneamentu no Ijiene iha Komunidade) tuir nesesidade subdistritu husi Distritu 12. Iha 2012 FPA sira ne’e transfere hosi Programa BESIK ba governu Timor-Leste atu servisu nudar funsionariu ho kontratu.
“Loron ida ne’e sai hanesan loron espesiál ba ha’u tanba durante tinan 5 nia laran servisu de’it hanesan funsionáriu kontratadu maibé ohin bele sai ona hanesan funsionáriu públiku,” hateten Domingas Tavares do Santos, FPA husi postu administrativu Atabae, iha Munisipiu Bobonaro. “Ho estatutu ida ne’e halo ha’u sente fiar an liu tan wainhira ko’alia ho komunidade.”
Nune’e mós Cesar Conçeiçaõ de Fátima, FPA husi postu administrativu Remexio, Munisipiu Aileu hatete katak ho asina termos de aceitação ne’e bele garantia ona nia futuru moris nian.
“Ha’u kontente no orgullu tanba bele sai ona funsionáriu públiku. Antes ne’e ha’u servisu maibé ho laran ta’uk katak dala ruma ema bele hapara hau derrepente maibé agora ha’u sente kontente tanba ha’u funsionáriu permanente ona,” haktuir FPA de Fátima.
FPA sira nia servisu mak hamutuk ho Grupu Manajementu Fasilidade (GMF) hodi fo apoiu liu hosi fasilita komunidade hodi halo planu ba sira nia sistema bee, fo treinamentu; no ajuda GMF no komunidade halo operasaun no manutensaun ba sira nia sistema bee rasik.
FPA na’in 76 kompostu hosi feto na’in 16 (21%) no mane nain 60 (79%), servisu iha munisipalidade sanulu resin tolu (13) iha rai laran.
Funsionáriu ne’ebé asina termo de aceitação iha Ministerio das Obras Publicas (MOP) hamutuk 152 hodi sai governu Timor-Leste nia funsionariu publiku. Funcionario sira ne’e kompostu husi Instituto Gestão Ekipamentos (IGE) 59 no DNSA 93 fahe ba Departementu Desalinizasaun 17 no FPA 76. Durasaun ba Termo de Aceitação ne’e ba fulan sanulu resin rua nia laran ka periudu probatorio.
“FPA sira mak atu halo ligasaun entre komunidade no governu. Durante tinan rua BESIK finansia FPA sira hodi suporta DNSA ho servisu jestaun sistema bee moos iha nivel postu administrativu,” hateten BESIK nia Diretór Programa Roger Guinery. “Ha’u aproveita oportunidade ida ne’e atu hato’o ekipa BESIK tomak nia parabens ba FPA sira tanba liu hosi rezultadu sira nia servisu ezemplár durante ne’e governu Timor-Leste foti desizaun atu fo kontratu permanente ba sira nu’udar funsionariu publiku.”
Tuir Dekretu Lei Bee No. 4/2004, iha Timor-Leste komunidade rurál mak iha responsabilidade atu halo jestaun ba sira nia fasilidade bee rasik liu hosi GMF ho suporta hosi FPA sira.
