Ministru Negosiu Esrangeiru e Kooperasaun (MNEK), Jose Luis Guterres, promete katak problema disputa rai iha Naktuka, distritu Oe-Cusse sei rezolve iha tinan ne’e.
Ministru Guterres, hateten negosiasaun la’o nafatin ho governu Indonezia kona ba rai ne’e.
“Ita hein, katak iha tinan ida ne’ e ita halo esforsu duni para bele kompleta prosesu de limitasaun fronteiras,” Ministru Guterres hateten, iha Pantai Kelapa, Dili.
Nia hatutan, governu Indonezia mantein sira nia posisaun hodi lakohi entrega rai Naktuka ne’e ba Timor –Leste, tanba sira konsidera rai ne’e partensia Indonezia nian.
“Mais ita halo bebeik aprosimasaun ho sira,” Ministru Guterres hateten.
Maibe, nia dehan, Timor-Leste tenke orgulho tanba 88% fronteiras terestress ne’e akordadu ona inkluido rai Naktuka ne’ebe seidauk rezolve.
Iha parte seluk Deputadu Inacio Moreira, hateten rai Naktuka problema ne’ebe kompleksu tebes, se tinan ne’e governu rezolve konserteza ne’e progresu servisu ne’ebe diak.
“Ita hein para sira bele rezolve,” Deputadu Moreira esperansa.
Maibe, nia hateten, tuir istoria ne’ebe iha husi biz-avon sira katak rai Naktuka ne’e partensia ba Timor nian.
Nia hatutan, lolos ne’e governu tenke rekolha informaun sira ne’e hodi hafasil no haforsa aprosimasaun ho Indonesia hodi resolve problema ne’e.
“Informasaun sira ne’e importante, halo peskija no buka tuir rai ne’e nia hun,” Deputadu Moreira hateten.
