Membru Parlamentu Nasional kestiona Sentru Dezenvolvementu Komunidade Agrikula (SDKA) ne’ebe Ministeriu Agrikultura e Peskas halo iha sub-distritu Maubisse, distritu Ainaro husik abandona.
Membru Komisaun E (dezenvolvementu e ekonomia), Deputada Josefa Alvares Soares, hateten fatin ne’e abandona tanba antes halo sentru ne’e governu la halo estudu viabilidade, nune’e halo hotu husik hela.
“Ne’e katak ita nia estudu viabilidade ladiak,” Deputada Soares kestiona, iha Parlamentu Nasional.
Tuir nia, lolos antes harii sentru ida tenke halo uluk estudu viabilidade, prepara programas nune’e sentru ne’e bele funsiona no iha sustentabilidade.
Nia kritika, katak projetu ne’ebe Ministeriu Agrikultura e Peskas (MAP) halo iha distritu-distritu balun funsiona no balun laiha.
Entretantu Ministru Agrikultura e Peskas, Mariano Asanami Sabino, rezeita informasaun ne’e, tanba to’o agora sentru ne’e funsiona ho diak, tanba integra ba setor privadu no sira mak jere.
“Setor privadu mak halo jestaun, ita laiha osan manutensaun, ita harii tiha depois kolabora ho setor privadu,” Ministru Asanami hateten.
Tuir nia, importante mak fatin ne’e labele uja ba bisnis, tanba fatin ne’e uja ba treinamentu ou pemberdayaan no fatin hodi tau fini. “Ita nafatin fo prioridade ba ida ne’e.”
