Mesmu Extractive Industry Transparency Iniciative (EITI) hatudu ona nia existensia servisu durante tinan hat iha Timor-Leste , maibe tuir Koordenador Oil Transparancy Luta Hamutuk, Nelson Miranda, hateten komunidade iha area rurais 85% la hatene knar EITI nian.
Nia hateten rejultadu ne’e bazea ba asesmentu ne’ebe organizasaun Luta Hamutuk halo iha sukus hamutuk 24, iha distritu 13.
“Desiminasaun ne’e rasik seidauk la’o efektive,” Koordenador Oil Transparancy Miranda hateten, iha Dili.
Nia rekonese, iha tinan kotuk EITI halo desiminasaun informasaun ba komunidade maibe iha deit Dili, no iha nivel distrital laiha.
“Ne’e hatudu katak la tau importansia ba komunidade ne’ebe hela iha area rurais atu hatene,” Miranda hateten.
Tanba ne’e nia sujere ba Sekretariadu EITI, wainhira fo desiminasaun infomasaun ba komunidade labele hatudu deit numeru, maibe tenke hatudu mos sistema no maneira servisu.
“Tenke esplika, pur ezemplu nia hetan taxa, taxa saida? Tanba saida mak tenke selu taxa, ba to’o iha governu no komphania simu hanusa,” Miranda sujere.
Hatan ba kestaun ne’e Koordenadora EITI Timor-Leste, Elda Guterres da silva, rekonese katak desiminasaun informasaun ba komunidade kona ba ba knar EITI seidauk masimu.
Tanba ne’e planu ba tinan oin (2015) EITI sei focus liu ba fahe informasaun knar EITI iha Timor-Leste nune’e mos implementasaun EITI.
“Depois de halo relatoriu ida ne’e ami sei halo desiminasaun ba komonidade,” Koordenadora EITI da Silva hatete.
Nia hateten mesmu komunidade iha area rurais barak mak seidauk hatene kona ba implementasaun EITI, maibe barak hanesan joventude, sosiedade sivil, estudante hatene ona kona ba Orsamentu hosi aktividade mina no gas.
“Wainhira EITI seidauk mosu iha Timor- Leste ita lahatene ita nia montante orsamentu ne’e hira,” da silva hateten.
