Membru Parlamentu Nasional, Deputadu Arao Noe, hateten durante ne’e ema idak-idak halo konstruksaun uma ou konstruksaun loja arbiru deit, tanba seidauk iha lei ordenamentu teritoriu.
Deputadu Noe, hato’o kestaun ne’e relasiona ho uma (privadu) andar hat ne’ebe halo besik iha Palasiu Governu nia sorin ne’ebe as liu fali edifisu palasiu governu.
“Lolos loja ou uma ne’ebe besik iha palasio governu labele as liu fali palacio, tanba sei fo ameasas intermus seguransa, karik nasaun seluk hala’o visitas mai iha palasio oinsa atu tau seguransa,” Deputadu Noe kestiona, iha Parlamentu Nasional.
Maibe nia dehan, governu labele bandu, tanba oras ne’e dadaun seidauk iha baze legal kona ba asuntu ne’e.
“Tenke iha lei atu define fatin kantor sira iha ne’ebe, fatin loja ho supermarket sira iha ne’ebe no fatin populasaun sira,” Deputadu Noe hateten.
Tanba ne’e nia husu ba governu atu esplika, se’e mak fo autorizasaun ba kompania privadu halo loja bo’ot ho andar liu fali palacio governu.
Hatan ba kestaun ne’e Ministru Estatal (MAE), Jorge Teme, rekonese katak governu seiduak iha lei ordenamentu teritoriu, maibe agora tama ona planu hodi halo lei ida kona ba asuntu ne’e.
“Ami sei halo lei ida, oinsa regula kona ba uma ne’ebe besik iha embaixada, uma ne’ebe besik ho misaun ema estrangeiru sira, uma besik sede estadu ninian, tenke metru hira no limita nia a’as,” Ministru Teme hateten.
Maibe, nia dehan, ne’e la fasil no sei involve administrador no xefe suku sira, tanba presiza halo mediasaun ho povu kona ba lei ne’e. “Ita nia povu komprende kona ba lei ne’e no povu aseita katak ida ne’e importante duni,”.
Kona ba konstruksaun uma (privadu) andar ne’ebe as liu fali palasiu governu, nia dehan, governu la fo autorizasaun ba se deit halo uma andar besik palasiu governu ne’ebe as liu fali.
“Mais governu mos labele bandu, tanba seidauk iha lei ida atu bandu,” Ministru Teme hateten.
Maibe Governu sei esforsu hodi prepara esbosu lei ida, para hetan diskusaun ou debate depois deside, sei konsege deside maibe ema ne’e halo uluk ona antes lei ne’e aprova antaun “ita sei la haruka sobu fali,” nia dehan.
