Membru Parlamentu Foinsa’e (MPF) lamenta tanba la hetan fundus husi Sektretariu Estadu Joventude no Desportu (SEJD) atu hala’o programa iha sira nia distritu ida-idak.
Membru Parlamentu Foinsa’e, Aurea Isaura Laura do Santos Cancio, hateten durante ne’e aktividades ne’ebe sira hala’o iha sira nia distritu la hetan apoia orsamentu husi Sekretariu Estadu Joventude no Desportu (SEJD).
“Programa ne’ebe mak ami hala’o iha distritu, ami ajuda maluk sira ne’ebe mak laiha servisu, la eskola, balun remata la kontinua eskola ami fo informasaun ba sira, maibe ami nia orsamentu mak la suporta,” MPF Cancio preokupa, iha Dili.
Tanba ne’e, nia husu ba SEJD atu tau matan ba sira hanesan osanmetu ruma tanba, aktividades barak mak presiza hala’o iha suku liu-liu iha area rural sira.
Nia dehan, jovens barak liu-liu iha distritu Baucau barak mak hakarak kontinua sira nia eskola iha universidade maibe ekonomia mak la premite sira.
Entretantu Membru Parlamentu Nasional, Deputadu Eladio Faculto, hateten SEJD tenke fo konesementu ba MPF sira, karik sira iha lamentasoens ruma presiza haree no tau atensaun.
“Hau husu ba SEJD tenke rezolve ba problema parlamentu foinsae sira nian,” Deputadu Faculto hateten.
Alem de ne’e, Prezidente Conselhu Nasional Joventude (CNJTL), Leovigildo Hornai, rekonese katak Parlamentu Foinsa’e la hetan fundus husi SEJD atu hala’o sira nia aktividade, tanba sira la halo transferensia publiku ida ba sira.
“Parlamentu Foinsa’e laiha orsamentu propriu, maibe sira bele organiza aktividade iha organizasaun hanesan governu nian ba halo peskiza, advokasia no halo konferensia ba sira nia knar,” nia dehan.
Hatan ba kestauun ne’e, Sekretariu Estadu Miguel Margues Manetelo, katak osan ba Parlamentu Foinsa’e ne’e iha, maibe ba hala’o aktividades nian.
“La’os fahe ba sira ida-idak,” SE Manetelo hateten.
