Membru Parlamentu Nasional konsidera Sekretariadu Estadu Obras Publiku (SEOP) fo projetu ba Kompania Sinco Irmaun halo konstruksaun ponte Irabere iha distritu Viqueque ho dalan ilegal.
Membru Komisaun E (infra-estruktura, transporte e komunikasaun), Deputadu Inacio Moreira, hateten projetu konnmstruksaun ponte Irabere ne’e la tuir prosesu legal.
“Dezenu laiha, kontratu laiha inklui Bill Of Quantity (BOQ) mos laiha,” Deputadu Moreira hateten, iha Parlamentu Nasional.
Nia hateten, wainhira Komisaun E bolu urjente Ministru Obras Publik (MOP) mai halo audiensia ho komisaun E, ministru rasik deklara laiha konesementu kona ba konstruksaun ba projetu halo ponte Irabere.
“Tenke hapara projetu ne’e, se la’e kompania halo tiha governu la selu tanba laiha kontratu,” Deputadu Morreira hateten.
Total orsamentu ba obra ne’e $7,5 mil, tuir lolos, nia dehan, Ministru Obras Publiku iha konesementu kona ba ida ne’e, tanba osan ne’e aprova iha Konselho Ministru.
Tanba nia dehan, tuir lei aprovisionamentu osan $6 milions ba leten tenke iha aprovasaun husi Konselho Ministru, e kontratu ba projetu ne’e tenke haruka ba Tribunal de Kontas, depois tribunal kontas sei fo vistu prebio mai iha MOP, depois ministeriu relevante foin halo orden de trabalho.
“Nia dalan legal hanesan ne’e, maibe prosesu ne’e la akontese SEOP la halo,” nia dehan.
Hatan ba kestaun ne’e Sekretariadu Estadu Obras Publiku (SEOP), Luis Vaz Rodrigues, katak projetu ne’e dezenhu no BOQ (iha), tama iha projetu emergensia 2012, so implementasaun projetu mak foin halo iha tinan ida ne’e.
“So lolos obra ne’e halo kedas iha 2012, maibe tanba kompania laiha edifisiu no konsultan mos laiha edifisiu, entaun adia no foin agora mak halo projetu ne’e tanba kompania iha ona edifisiu,” SE Rodrigues hateten.
“Ne’ebe projetu ne’e legal.”
Kona ba Ministru laiha konesementu, nia parte rejeita tanba obra hotu-hotu ne’ebe MOP halo sempre iha konesementu husi Ministru.
