Membru Parlamentu Nasional konsidera rehabiitasaun estradas husi Tibar ba distritu Liquisa la’o tarde liu, tanba to’o agora seidauk atinji pursentu ne’ebe signifikativu.
Membru Komisaun E (infra-estruturas, transportes no komunikasaun), Deputadu Manuel Castro, hateten rehabilitasaun estrada ne’e halo kedas iha fulan hira liu ba maibe nia progressu ne’e foin mak atinji 20% deit.
“Sira servisu neneik liu,” Depuadu Castro preokupa, iha Parlamentu Nasional.
Alende ne’e Deputadu Castro, mos kestiona kona ba moru protesaun ne’ebe tesik ba Maubara foin halo sorin deit no valeta seidauk halo tan.
Tanba ne’e nia dehan, kompania ne’ebe kaer projetu ne’e la tuir ona tempu ne’ebe determina husi governu.
Tuir nia, rehabilitasaun estrada iha parte Karimbala ba Loes la’o lais liu duke Liquisa mai Tibar. Tanba ne’e husu ba Ministeriu Obras Publik atu toma nafatin atensaun.
Nia mos husu ba kompania ne’ebe kaer obra ne’e, atu halo estrada ne’e ho kualidade nune’e bele dura to’o tinan barak.
“Tanba osan nebe uja ba halo obra ne’e hamutuk $20 ital milioens,” nia hateten.
Entretantu tuir Deputadu Albina Marcal, katak obra ne’e la’o hela no kompania hatudu duni kualidade servisu ne’ebe diak.
“Maibe labele paradu no labele lori tinan naruk, tanba dalan ne’e dalan nasional,” Deputada Marcal sujere.
Hatan ba kestaun ne’e Ministru Obras Publiku (MOP), Gastao de Sousa, katak rehabilitasaun estrada Tibar-Liquisa agora dadaun lao hela no hatudu progresu ne’ebe diak.
“Kompania halo hela sira nia servisu, ita hein deit,” Ministru Sousa hateten.
Nia dehan, mesmu kontraktu asina kedas ona iha tinan kotuk (2013), maibe obra ne’e foin mak lao iha tinan ida ne’e (2014) fulan lima liu ba, tanba material ne’ebe komphani presija tama mai iha timor atraza oituan.
