Iha tinan ida ne’e governu Nova Zelandia aloka tan orsamentu $8,5 miloens hodi apoiu ba dezenvolvementu Timor –Leste liu husi programa asistensia ne’ebe durante ne’e hala’o iha Timor –Leste.
Embaixador Nova Zelandia iha Timor –Leste, Jonathan Schwass, hateten Nova Zelandia servisu maka’as hela atu fo asistensia ba governu Timor –Leste iha setor oioin hodi haforsa dezenvolvementu Timor –Leste, liu –liu iha setor ekonomia.
“Dadaun ne’e ami fo hela assistensia ba iha setor privado liu –liu hasa’e kapasidade haforsa ekonomia Timor –Leste nian, tanba setor privado mak save ba dezenvolvementu ekonomia iha rai laran,” Embaixador Nova Zelandia, Jonathan Schwass hateten, iha Motael, Dili.
Alende setor ekonomia, nia hateten, sira mos fo hela asistensia teknika ba iha setor edukasaun, seguransa, justisa liu –liu ba iha servisu provedoria nian.
“Iha setor edukasaun ami focus ba iha dezenvolvementu pre-eskolar, seguransa ami nia polisia komunitaria iha ne’e servisu hamutuk ho PNTL hodi dezenvolve polisia komunitaria iha teritorio tomak, ami mos fo asistensia ba servisu providoria nian,” Embaixador Schwass hateten.
Alende ne’e, nia hatutan, sira mos servisu hamutuk ho agensia Unicef hodi dezenvolve pre-eskolar iha fatin hirak ne’ebe labarik sira seidauk asesu ba edukasuan sedu.
Iha parte seluk, Vise Ministru Komersio Industria e Ambiente (MCIA), Abel da Costa Ximenes, agradese ba apoiu sira ne’ebe parseiru dezenvolvementu sira fo ba Timor –Leste, liu –liu iha setor ekonomia.
“Hau fo agradese wa’in ba Embaixador Nova Zelandia, tanba apoiu ida ne’e sei iha nia kontinuidade,” Vise Ministru Ximenes agradese.
Durante ne’e, nia hateten, governu Nova Zelandia apoia ona setor privado sira, liu –liu grupo koperativa sira atu dezenvolve an hodi haforsa dezenvolvementu ekonomia iha rai laran.
Tanba ne’e nia husu ba grupo koperativa sira ne’ebe hetan apoiu no asistensia husi nasaun doadores, atu aproveita apoiu sira ne’e hodi dezenvolve koperativa diak liu tan no sai koperativa ne’ebe sustentabilidade.
Entretantu Diretor Koperativa Kafe Timor, Xisto Moniz, hateten rekonese katak governu Nova Zelandia apoia ona sira iha programa rehabilitasaun kafee no loke ona sentru treinametu agrikultura ida hodi fo formasaun hasa’e abilidade ba agrikultor sira.
“Ami agradese ba Nova Zelandia ne’ebe primeiru vez ajuda ami, maibe iha komitmentu atu kontinua fo apoia,” Diretor Moniz hateten.
Nia hatutan,programa rehabilitasuan kafee hatudu rezultadu diak tebes iha tinan ida ne’e kompara ho tinan hirak liu ba.
