Rede Edukasaun Timor-Leste Coalition for Education (TLCE) preokupa maka’as kona ba falta livrus ne’ebe kuaze eskola hotu iha rai laran infrenta, tanba ida ne’e bele fo impaktu ba kualidade estudantes iha prosesu aprendizajen.
Jestor Programa TLCE, Matias dos Santos, hateten livrus ne’e importante tebes, tantu ba profesores no ba estudantes hodi buka referensia relevante ho materia ruma.
“Livru sai hanesan sasukat ida ba kualidade estudante sira nian, se livru laiha, atu hanorin saida ba alunus sira,” Jestor Programa TLCE, Santos kestiona, iha Dili.
Kona ba material ne’ebe laiha livrus, nia dehan, durante ne’e profesores sira buka meius oinsa mak bele hanorin estudantes relevante ho lisaun ne’ebe iha.
Tanba ne’e, nia husu ba Ministeriu Edukasaun (ME) hodi toma atensaun ba kestaun ne’e, nune’e bele hadia kualidade edukasaun iha Timor-Leste.
“Ministeriu Edukasaun tenke servisu maka’as hodi produs livru ne’ebe mak seidauk kompletu, nune’e bele responde ba ejizensia profesores no estudantes nian,” nia sujere.
Iha parte seluk, Diretor Eskola Ensino Baziku Rumbia, Kaikoli, Abilio Pereira, hateten sira sei falta livrus manual, liu-liu hanesan lisaun Relijiaun Moral, Lian Tetun no seluk tan.
“Ami sei falta livrus kona ba Agama, Tetun no seluk tan,” nia dehan.
