Governu liu husi Administrasaun Distritu Dili bandu ona komunidades iha Dili laran hodi ba hakohi mate isin iha semiteriu Santa Cruz no Bidau Santana, tanba fatin nakonu tiha ona.
Supervisor Semiteriu Santa Cruz no Because, Domingos Caldeira Martins, hateten semiteriu Sta. Cruz la simu mate isin foun desde governu loke semiteriu foun iha Becusse-Becora iha dia 18 Junu 2014.
“Mate isin foun hakoi hotu iha semiteriu Becusse,” Supervisor Martins hateten, iha semiteriu Sta.Cruz, Dili.
Nia dehan, semiteriu rua Santa Cruz no Bidau Santana laiha ona espasu hodi simu tan mate isin, tanba ema bo’ot ka ki’ik.
“Lia fuan ne’e Primeiru Ministru rasik mak koalia sai bainhira inagura semiteriu Becusse, tantu ema bo’ot ka ema ki’ik, sei la hakoi tan iha ne’e, maibe familia hakarak ke’e fali ruin, ne’e bele,” nia hateten.
La’os deit semiteriu rua ne’e, Administrador Distritu Dili, Gaspar Soares, hateten semiteriu Bedois mos la simu ona hakoi mate isin foun, maske sira kee tiha mate isin tuan.
“Governu prepara kedas ema iha semiteriu Becusse, sira mak kee rai kuak no hakoi mate isin, buat hotu sira mak prepara, ita familia asiste deit,” Administrador Soares hateten.
Iha mos kriteriu ba semiteriu foun ne’e, mak nia dehan, rate labele halo andar, rate hotu-hotu ukuran 50 cm, nia klean 1,50, naruk 2m, luan 80.
Nia dehan, ne’e regulamentu husi diploma ministerial nian, laiha tan modelu oi-oin “semiteriu foun ne’e loke hahu tuku 8:00 dader to’o 6:00 lokraik,” Administrador Dili ne’e hateten.
Entretantu Felisberto da Silva, hanesan komunidade nia konkorda ho politika governu ne’e, tanba realidade semiteriu Sta.Cruz nakonu liu ona.
Alem de ne’e, nia dehan, semiteriu Santa Cruz nee fatin historiku, tanba Timor oan barak mak mate no terus iha fatin ida ne’e iha okupasaun Indonezia nia tempu.
“Ne’ebe ita mos tenke respeitu fatin ne’eba sai hanesan historiku ida ba ita nia jerasaun foun,” nia dehan.
