Ministerio Saude (MS) dadaun ne’e monta ona pesoal saude iha aero portu Nicolao Lobato no fronteiras terestre hodi kontrola no prevene transmisaun virus Ebola mai iha Timor –Leste, tanba virus ida ne’e hamate ona ema rihun resin iha nasaun Afrika.
Diretor Nasional Saude Komunitaria, Carlito Freitas Correia, hateten sistema preparado ona atu responde ba virus Ebola bainhira detekta.
“Ita nia sistema prontu no ami nia pesoal saude mos preparadu ona atu responde ba situasaun ida ne’e, maibe agora ita seidauk detekta kazu ida ne’e,” Diretor Correia hateten via telefone.
Nia hatutan, MS servisu hamutuk ho Organizasaun Saude Mundial (WHO) estabelese ona matadalan atendementu ba virus Ebola no fo treinamentu ba pesoal saude sira kona ba moras ida ne’e tuir matadalan ne’ebe iha.
“Karik kazu ne’e mosu, sira hatene ona oinsa halo tratamentu liu –liu kaer direita moras ida ne’e,” nia hateten.
Iha parte seluk, reprezentante WHO iha Timor –Leste, Doutor Jorge Mario Luna, hateten sira nia parte fo ona apoiu tekniku ba iha MS estabelese matadalan atendementu, haforsa servisu vizilansia no laboratorium atu responde ba kazu ida ne’e, karik mosu.
“Ami fahe ona matadalan manegamentu keixa no atendementu laboratorium nian no ami mos fo treinamentu ba medikus, tekniku laboratorium sira atu halo manegamentu ba keixa, kolekta sampel, rai iha fatin ne’ebe seguru atu labele daet, tanba risku bo’ot,” doutor Luna hateten.
Tuir nia, risku virus ebola iha Timor –Leste ki’ik tebes, maibe tenke iha preparasaun antes, nune’e bele responde ba kazu sira hanesan ne’e karik loron ruma mosu.
“Ita aproveita oportunidade ida ne’e hodi haforsa kapasidade nasional nian atu responde ba kazu emergensia sira hanesan virus ebola, H1N1 no seluk tan ne’ebe tama mai iha rai laran,” nia dehan.
Alem de ne’e nia dehan, sira mos servisu hamutuk ho MS atu halo sosializasaun informasaun ba komunidade sira kona ba lalaok virus ida ne’e.
Tuir dadus OSM ikus dia 8 fulan Outubru 2014, virus ebola hamate ona ema nain 4024 iha Guinea, Liberia, Sierra Leone no transmite ona ba iha nasaun sira seluk hanesan Nigeria, Senegal, Spain no United states of America.
Entretantu Membru Komisaun F (saude, edukasaun, kultura, veteranus no igualidade jeneru), Eladio Faculto, hateten antisipasaun ne’e importante tebes, tanba sistema saude iha Timor –Leste sei frazil hela.
“Ita rai ki’ik iha dificuldade oioin, liu –liu problema funsionamentu ospitais sira ne’e, rekursu humanus, bele implika tanba ne’e antisipasaun cek iha aero portu sira ne’e importante tebes,” nia dehan.
