Komisaria Komisaun Nasional Direitu ba Labarik (KNDL), Maria Barreto, hateten labarik ho otas ki’ik tinan 0 to’o neen (6) ne’e idade ida atu sira dezenvolve an, tanba ne’e husu ba familia no komunidade atu fo protesaun no atensaun sedu ba sira.
Nia dehan, familia no komunidade mak primeiru pesoal ne’ebe fo protesaun no promove labarik sira nia partisipasaun iha aspetu hotu hodi kontribui ba iha dezenvolvementu labarik nian.
“Ne’e idade osamean ba dezenvolve an, se ita la kuidadu sira ho otas ida ne’e labarik sei hetan dezenvolvimentu tarde intermus fisiku, lingua, mental la dezenvolve ho diak iha sira nia moris,” Komisaria Barreto hateten.
Komisaria mos bolu ema hotu nia atensaun, atu fo prioridade hodi protese labarik sira ho idade ida ne’e diak liu tan, liu –liu husi violensia sira hanesan abuzu seksual, abandonadu, diskriminasaun no seluk tan.
“Violensia hamate labarik sira nia dezenvolvementu,” nia dehan.
Iha parte seluk Diretor Nasional Childfund Timor-Leste, Geoffrey Ezepuc, promete sei kontinua servisu hamutuk ho instituisaun governu no organizasaun locals ne’ebe servisu iha area atensaun sedu ba labarik, fo servisu ne’ebe kualidade hodi promove partisipasaun labarik iha aspetu hotu.
Nia hatutan, labarik ne’ebe la hetan atensaun sedu, nia dezenvolvementu ladiak intermus intelektual, mental kompara ho labarik sira ne’ebe hetan atensaun sedu.
“Ami nafatin hametin grupo trabalho oinsa atu halo servisu ho kualidade diak liu tan hodi promove no dezenvolve nafatin partisipasaun labarik iha aspeitu hotu,” nia hateten.
Grupo trabalho ne’ebe servisu fo atensaun sedu ba labarik ho idade (0-6) mak Ministerio Edukasaun, Saude, Ministerio Justisa, Ministerio Solidaridade Sosial inklui mos organizasaun local sira.
