Diretor Klinika Bairo Pite, Daniel Murphy, hateten numeru moras Tubercoluse (TBC) kontinua as iha rai laran, no kada loron klinika sempre registu kazu ne’e.
Tanba ne’e, tuir nia, presiza halo kontinuasaun programa sosializasaun edukasaun prevensaun ba komunidade sira, no haforsa sistema atendementu ba moras ida ne’e.
“Pasiente TBC bele dehan tinan ida ita identifika ema hamutuk 400 afetadu TBC positive,” Doutor Dan hateten, iha Bairo-Pite, Dili.
Nia hatutan, durante ne’e sira fo atendementu ba pasiente TBC sira bazeia ba iha protokolu organizasaun saude mundial nian, la ses husi protokolu ne’e.
Kona ba stok aimoruk, nia dehan, laiha problema tanba hetan apoiu husi fundu global liu husi Ministerio Saude.
Iha parte seluk, pasiente Manuel Freitas, hateten durante ne’e so klinika KBP mak halo tratamentu no atendementu kona ba moras TBC.
“Ita hotu hatene bain-bain ema kuandu hatene an moras TBC, hotu-hotu halai mai Klinika Bairo-Pite, liu –liu hasoru doutor Daniel atu konsulta,” pasiente ne’e hateten.
Entretantu Manager Klinika Motael, Jacinto dos Reis Alves, hateten oras ne’e dadaun Ministerio Saude ho parseiru sira (local no internasional) hala’o programa kona ba TBC iha 13 distritus no maioria populasaun afeta moras ne’e.
Nia haktuir, moras TBC ne’e fiksu, entaun tratamentu mos lori tempu ne’ebe naruk, ba labarik presiza tempu fulan neen no adulto sira fulan walu bele hetan suade diak.
“Iha ne’e pasiente TBC nain 40 resin mak halo hela tratamentu, iha balun rekopera onam” Alves hateten.
Nia hatutan, klinika Motael mos fo atendementu gratuita ba pasiente TBC sira, tanba klinika ne’e hetan apoiu aimoruk husi Ministerio Saude.
