Governu iha ona planu atu harii terminal bo’ot ida iha merkadu Taibesi, no bis sira distritu hat parte leste (Lospalos, Viqueque, Baucau no Manatuto) nian sei para hotu iha terminal ne’e.
Vise Primeiru Ministru, Fernando Lasama de Aroujo, hateten durante ne’e bis husi parte leste ne’e lori tama kedas pasajierus to’o sira nia uma, tanba kondisaun terminal Becora klo’ot liu.
“Ami planu ona atu hadia fatin terminal iha merkadu Taibesi ba distritu hat nian,” Vise PM Lasama hateten, iha merkadu Taibesi, Dili.
“Bis tenke para hotu iha terminal ne’e no taxi sira mak tula pasajeirus ba sira nia hela fatin, la’os hanesan agora mai husi distritu, bis ba husik hela iha uma,” Lasama hateten.
Alende ne’e, nia dehan, planu ida ne’e parte ida atu atria konsumedor sira mai sosa sasan iha merkadu Taibesi. “Para ema mai haree imi nia modo no roupa, planu diak, merkadu sei moris,”.
Kona ba orsamentu ba planu ida ne’e, Deputada Maria Adozinda Pires da Silva, hateten iha orsamentu ba tinan ida ne’e (2014) la preve, maibe orsamentu tinan oin nian (2015).
“Tinan ida ne’e nian laiha, hein deit tinan oin mak Parlamentu Nasional aprova hodi halo terminal,” Deputada da Silva hateten.
Iha sorin seluk Kondutor Bis Baucau, Carlos Alves, sente kontente ho planu ida ne’e, tanba durante ne’e sira tenke lori pasajeirus tama to’o uma.
“Ami nudar kondutor sente kontente, tanba ami la lori ona pasajeirus ba sira nia uma no hatun deit iha terminal,” nia dehan.
