Transporte sai obstaklu bo’ot ba iha Diresaun Servisu Agua no Saneamentu (SAS) Distritu Dili hodi fasilta sira nia servisu, tanba to’o agora kareta sei menus hodi tula foer iha Dili laran.
Xefe Departamentu Saneamentu Distritu Dili, Domingos dos Santos, hateten total kareta (kontratu) ne’ebe durante ne’e foti foer iha Dili laran hamutuk 30, inklui husi governu nian hitu, maibe seidauk sufsiente kobre fatin hotu.
“Kompania mak produs foer barak liu duke foer uma laran nian,” Xefe dos Santos hateten, iha Matadouru, Dili.
Nia hateten, atu evakua deit foer uma laran ne’e kareta 30 sufsiente, maibe foer husi kompania sira (restorante, lojas, warung no seluk tan) ne’ebe iha sidade laran ne’e .
“Ami hato’o ona proposta ba iha Ministerio Adminsitrasaun Estatal atu aumenta tan kareta hitu, maibe ami nia proposta la pasa, tanba orsamentu la to’o no aloka fali ba kada sukus atu jere,” nia dehan.
kada loron ida, nia dehan, kareta (kontratadu) foti foer ret tolu, kareta governu nian foti dala rua ou tolu, “depende ba kombustivel ne’ebe iha, tanba kombustivel laiha operasaun la la’o,” nia hateten.
Tanba ne,e nia dehan, saneamentu distritu Dili sei la garante sidade Dili sei moos, tanba komunidade barak sei soe foer arbiru deit.
Entretantu Membru Parlamentu Nasional, Deputada Maria Fernanda Lay, hateten kareta tula foer nian menus duni, tanba ba tula fali fos merenda eskolar nian.
“Iha fiskalizasaun ami nian iha distritu Dili, Ministru haruka fali kareta ba tula merenda eskolar ba iha sub-distritu,” Deputada Lay hateten.
Hatan ba kestaun ida ne’e Ministru Administrasaun Estatal, Jorge da Conçeicão Teme, rezeita fo autorizasaun kareta saneamentu tula fos merenda eskolar, tanba saneamentu rasik menus transporte.
“Hau seidauk autoriza kareta foti lixu nian ba lori merenda eskolar, hau sei verifika atu hato’o ba Parlamentu ho karta ida, tanba hau mos hafodak oituan ho informasaun ne’e,” Ministru Teme hateten.
