Membru Parlamentu Nasional kestiona maka’as traktor bo’ot 11 ne’ebe husik at iha sub-distritu Maliana, tanba Ministeriu Agrikultura e Peskas (MAP) la halo manutensaun ba traktor hirak ne’e.
Deputadu Felisberto Guterres, hateten iha tinan kotuk (2013) Parlamentu Nasional aprova osan ba manutensaun traktor, maibe osan hirak ne’e governu la uja hodi hadia traktor refere.
“Antaun osan sira uja ba halo saida, ministru tenke esplika,” Deputadu Guterres kestiona, iha Parlamentu Nasional.
Nia dehan, kestaun ne’e informa husi diretor regional sub-distritu Maliana ba membru Komisaun D (ekonomia e dezenvolvementu) bainhira halo fiskalizasaun iha fatin refere.
“To’o agora osan ba manutensaun traktor hirak ne’e husi nasional seidauk koloka ba regional, ne’e oinsa,” nia preokupa.
Hatan ba preokupasaun ne’e Ministru Agrikultura e Peskas, Mariano Asanami Sabino, rekonese faktus hirak ne’e, no prontu atu halo manutensaun ba traktori hirak ne’e.
“Hau tun ona ba haree direitamente, no agora halo hela manutensaun ba traktor sira ne’e,” Ministru Asanami Sabino hateten.
Ministru ne’e dehan, total traktor ne’ebe MAP distribui ba grupu agrikultores sira iha sub-distritu Maliana hamutuk 32 unit, ho tipu Kubota, traktor bo’ot hamutuk hat no medium iha 14.
Nia dehan tan, traktor ho tipu agrindo bo’ot ne’e iha rua (2), medium iha tolu. Tipu maservongusor bo’ot ne’e iha lima no medium iha hat.
“Ne’ebe 21 diak no funsiona no 11 mak at,” nia hateten.
