Membru Parlamentu Nasional husu ba governu Timor-Leste atu taka tiha eskola internasional, liu-liu Dili International School (DIS) ne’ebe kurikulum la tuir husi Ministeriu Edukasaun (ME) nian.
Membru Komisaun F (edukasaun, saude, kultura, veteranus no igualdade jeneru), Deputadu Eladio Faculto, hateten ida ne’e fo impaktu ba estudante Timor oan sira.
“Tanba eskola sira ne’e tenke iha regulamentu, labele mai loke eskola tuir sira nia hakarak deit, tenke kontrola diak-diak,” Deputadu Faculto sujere, iha Parlamentu Nasional.
Faculto, hateten eskola hotu-hotu inklui eskola internasional sira ne’ebe existe iha Timor-Leste tenke tuir kurikulum eskola ne’ebe Ministeriu Edukasaun fo sai.
Nia dehan, agora ne’e ema barak loke kursu barak, liu-liu hanesan loke kompania maibe la selu taxa, ne’e tenke iha esplikasaun, para sira bele hatene no tenke iha sertifikadu.
”Sistema ida hanesan ne’e ita labele husik, maibe ita tenke haree ema estranjeiru sira nia identidade, se eskola internasional sira lakohi tuir kriteria ne’e, konserteza taka,” nia dehan.
Iha fatin hanesan Vise Ministru Edukasaun Ensino Superior, Marcal Avelino, hatete eskola internasional sira ne’ebe existe iha Timor, sira tenke tuir duni kurikulum husi sira nia rain.
“La’os mai tuir fali ita nia kurikulum, maibe sira tuir nafatin nia sistema ne’ebe mak sira uja iha sira nia rain,” nia hateten.
