Membru Parlamentu Nasional husu ba Ministerio Saude atu fo justifikasaun klaru ba komunidade kona ba programa fahe batar uut ba inan isin rua no labarik ne’ebe paradu durante fulan rua ona.
Membru Komisaun F (saude, edukasaun, kultura, veteranus no igualdade jeneru), Deputada Ilda Maria da Conçeicão, hateten programa ida ne’e hanesan kontribuisaun hodi redus mal nutrisaun iha rai laran, tanba ne’e Ministerio Saude tenke toma responsabilidade ba nia kontinuasaun.
Nia hateten, bainhira Komisaun F halo fiskalizasaun iha distritus deskobre katak programa ida ne’e kuaze iha fasilidade saude hotu laiha ona, tanba kompania Timor Global ho Ministerio Saude la fornese ona batar uut.
“Ami ba iha sentru saude Ermera sira informa, lolos kada fulan sira fahe batar uut ba iha inan isin rua sira no labarik sira, maibe agora la fahe tanba batar uut laiha,” Deputada da Conçeicão levanta iha Parlamentu Nasional.
Hafoin simu informasaun ida ne’e, nia dehan, deputadus sira halo kedas fiskalizasaun ba iha produsaun batar uut iha kompania Timor Global ne’ebe lokaliza iha Gleno, no prova katak produsaun ne’e paradu durante fulan rua ona.
Iha parte seluk, komunidade Manuela da Silva, hateten iha tinan kotuk programa ida ne’e la’o kapas iha fasilidade saude publiku sira iha Dili laran inklui mos Klinika Bairo Pite, maibe agora paradu.
“Iha tinan kotuk liu ba fasilidade saude hotu iha Dili laran inklui mos distritu fahe batar uut no muskateiru ba inan isin rua no labarik, maibe agora laiha,” nia dehan.
Hatan ba kestaun ida ne’e, Xefe Departamentu Nutrisaun Ministeriu Saude, João Bosco da Costa, katak provizoriamente programa ne’e paradu, tanba falta rekursu no orsamentu atu kontinua.
Nia hatutan, oras ne’e dadaun sei halo sosializasaun no koordenasaun ho parseirus sira hodi hadia frakezas sira ne’ebe iha atu hahu implementa fali iha distritu lima ne’ebe idenfitika mal nutrisaun sei as.
“Agora planu hela atu komesa fali iha distritu lima; Ainaro, Covalima, Maliana, Ermera, Oe-Cusse no Dili, tanba husi rezultadu peskiza 2013 distritu hirak ne’e mak numeru mal nutrisaun as liu kompara ho distritu seluk,” Bosco hateten.
Nia dehan, Timor Global agora la halo produsaun, tanba durante ne’e Ministerio Saude propoint kuantidade mak sira produs tuir, sira la produs lor-loron.
