Vise Diretor organizasaun Fundasaun Mahein (FM), Joao Almeida, konsidera servisu Polisia Intelejensia durante ne’e tarde oituan, tanba tarde detekta konflitu ruma.
Tuir nia, Polisia Intelejensia tenke iha dadus proprio kona ba kazu sira ne’ebe sei akontese, nune’e fornese ba autoridade seguransa hodi halo medida de prevensaun.
“Realidade sira ne’e hatudu katak, servisu intelejensia la masimu atu bele detecta informasaun no fornese informasaun ba autoridade seguransa,” dehan vise director FM Almeida.
Tanba dadus laiha, nia dehan dala barak problema sira ne’e akuntese tiha ona mak Polisia Nasional Timor –Leste (PNTL) foin hakfodak halo atuasaun.
Hanesan iha tinan kotuk kazu kibata, nia hateten sololos ne’e polisia intelejensia detecta antes hodi nune’e halo medida prevensaun.
Hatan ba preokupasaun ne’e Komandante Operasaun Superintendente Armindo Monteiru rezeita katak servisu polisia intelejensia lao neneik liu, polisia intelejensia lao hela no funsiona hela.
Maibe, nia dehan Servisu intelejensia ne’e iha nia struktural, organizasaun no iha hirarkia. Polisia intelejensia nia servisu tenke liu husi komando, oinsa maineira atu kolekta informasaun no analiza informasaun, relata informasaun hodi foti medida prevensaun.
“Intelejensia nia informasaun ne’e mak hanesan baze fundamental ida oinsa atu bele foti medida ho prevene krimi iha rai laran,” dehan Komandante Operasaun Monteiru, iha Caikoli, Dili.
Nia hatutan durante ne’e krimi sira ne’ebe akuntese ne’e kauze kazu krimi spontanitas individual.
“Ne’ e ita labele kosidera hanesan krimi organizadu,” Komandante Monteiru relata.
