Organizasaun Judicial System Monitoring Program (JSMP), husu ba governu atu tau Defensor Publiku (DP) espesifiku ba labarik, nune’e bele fo asitensia legal ba sira ne’ebe hetan violensia seksual.
Koordenadora Peskiza Legal JSMP, Rita Marques, hateten presiza duni governu prepara defensor publiku ba labarik nian, tanba labarik ne’ebe iha kazu dalaruma susar atu fo informasaun ho lais.
“Tenke advogadu ne’ebe hatene duni oinsa bele halo atendementu ba labarik,” Koordenadora Marques hateten.
Marques hatutan, fo asistensia legal ba labarik durante ne’e hetan failansu oin-oin, hanesan iha Ministeriu Publiku iha deit prokurador nain ida mak toma konta ba labarik menor,enkuantu iha tribunal seiduak iha juis espesializada.
Durante ne’e, nia hateten, laiha diferensia tratamentu entre ema adultu ho labarik bainhira halo prosesu julgamentu iha tribunal.
Enkuantu Prezidente Defensor Publiku, Sergio Hornai, rekonese durante ne’e halo duni atendementu ba kazu labarik, maibe la’os ho kazu violensia seksual.
Defensor Publiku sira, nia dehan, barak liu atende kazu labarik ne’ebe hetan kazu adopsaun no kazu alimentasaun.
“Agora mak atu trasa planu hodi nomea defensoria publiku ba are espesifiku ba labarik ne’ebe hetan violensia seksual, ba labarik menor,” nia dehan.
Maibe, nia dehan, planu ida ne’e sei sosializa ho Ministeriu Publiku, Ministeriu Solidaridade Sosial ne’ebe mak toma konta ba labarik, nune’e wainhira nomea defensor public ba area espesifiku hirak ne’e bele la’o ho susesu.
