Internasional Republic of Institute (IRI) fasilita Membru Parlamentu nain rua husi bankada Fretilin no Congresu Nasional Rekonstrusaun de Timor (CNRT), hodi rona preokupasaun povu nian iha distritu Suai.
Iha ne’e komunidade sira hato’o difikuldade ne’ebe sira infrenta durante ne’e iha baze, hanesan menus bee moos, estradas (Aileu- Suai at total), kondisaun eskolas ne’ebe grave, inklui ponte balun ne’ebe kompania halo tiha, maibe husik abandona.
Deputadu Aniceto Guterres Lopes husi bankada Fretilin, hateten programa ne’e diak, tanba deputadu sira rona direitamente preokupasaun povu iha baze, no bele levanta iha plenaria.
“Prekupasaun hirak ne’e hanesan problema ne’ebe sei hato’o ba governu,” Deputadu Lopes hateten, iha Suai.
Iha fatin hanesan reprezentante Administrador Distritu Suai, Jacinto dos Santos, apresia tebes ho programa ne’e no fo duni valor positive ba povu Suai.
“Deputadu sira hatene lolos difikuldade povu nian iha baze,” nia hateten.
Entretantu Senior Program Officer Carlito Nunes, hateten objetivu principal hosi enkontru publiku ne’e, atu hametin kontaktu pesoal entre membru parlamentu no povu iha area rural
Tanba nia dehan, povu iha area rural laiha meus atu hato’o sira nia preokupasaun direita ba ninia reprezentante sira iha Parlamentu Nasional.
“Deputadu sira atu rona no hatene prekupasaun povu nian hodi buka dalan atu fo solusaun ba povu nia prekupasaun,” Nunes dehan.
